O‘zbekiston prezidenti Shavkat Mirziyoyev Kuvayt amiri Navaf al-Ahmad al-Jobir as-Saboh vafot etgani munosabati bilan taʼziya yo‘lladi. Bu haqda prezident matbuot kotibi Sherzod Asadov xabar berdi.
Prezident marhumning ukasi, Kuvayt valiahdi shayx Mishʼal al-Ahmad al-Jobir as-Sabohga taʼziya yo‘lladi. Shavkat Mirziyoyev Kuvayt xalqiga hamda marhumning oila aʼzolariga chuqur hamdardlik bildirdi. Kuvayt amiri Navaf al-Ahmad al-Jobir as-Saboh 16-dekabr kuni 86 yoshida vafot etdi. Mamlakatda amir vafoti munosabati bilan 40 kunlik motam e’lon qilindi.
Amirning o‘limi sabablari oshkor etilmagan. Noyabr oyi oxirida u “sog‘lig‘i bilan bog‘liq muammolar” tufayli zudlik bilan kasalxonaga yotqizilgani xabar qilingandi. Navaf al-Ahmad al-Jobir as-Saboh Kuvaytni 2020-yildan beri boshqarib kelardi. U avvalgi amir, o‘gay akasi Saboh IV ning vafotidan keyin ushbu lavozimini egallagan.
Endilikda Kuvaytni 83 yoshli valiahd shahzoda shayx Mishʼal al-Ahmad al-Jobir as-Saboh boshqaradi.
Izoh (0)