Ijtimoiy tarmoqlarda “maktab o‘quvchi qizlari sinfdoshini samosud qilmoqda” sarlavhasi ostida videolavha tarqatildi. Xorazm viloyati Maktabgacha va maktab ta’limi boshqarmasi holat viloyatning Yangiariq tumanida sodir bo‘lganini ma’lum qildi.
Xorazm viloyati maktabgacha va maktab ta’limi boshqarmasi ishchi guruhi hamda tegishli tashkilot vakillari ishtirokida o‘rganilganda videolavhada aks etgan voqea 15-noyabr kuni Xorazm viloyati Yangiariq tumanidagi 17-son umumiy o‘rta ta’lim maktabining 7-sinf o‘quvchilari o‘rtasida katta tanaffus paytida sodir bo‘lgani aniqlangan.
Shu kuni ular o‘rtasidagi o‘zaro kelishmovchilik va janjal boshqa bir sinfdosh qiz tomonidan tasvirga olinib, ijtimoiy tarmoqqa joylangan.
Ushbu vaziyat tuman IIB xodimlari tomonidan muhokama qilinib, profilaktika inspektorlari tomonidan Ma’muriy javobgarlik to‘g‘risidagi kodeksning 47-moddasi 1-qismi bo‘yicha ma’muriy bayonnoma rasmiylashtirilgan.
Kelgusida shu kabi holatlar sodir etilishining oldini olish maqsadida viloyat maktabgacha va maktab ta'limi boshqarmasi, tuman IIB, mahalla fuqarolar yig‘ini faollari hamkorligida janjalda ishtirok qilgan o‘quvchilar hamda ularning ota-onalari ishtirokida profilaktik suhbat o‘tkazilib, tushuntirish ishlari olib borilgan.
Izoh (0)