Namanganda Ozarbayjon tibbiyoti kunlari boshlandi

Namanganda Ozarbayjon tibbiyoti kunlari boshlandi. Bu haqda “Daryo” muxbiri Azizbek Abduvaliyev xabar bermoqda.

Tadbirning yalpi anjumani viloyat Maʼrifat markazida bo‘lib o‘tdi. Viloyat hokimining o‘rinbosari G‘ulomjon Murodxo‘jayev ikki davlat o‘rtasidagi o‘zaro aloqalar ravnaq topayotgani, endilikda bu hamkorlik tibbiyot sohasida ham jadal rivojlanayotganligini taʼkidlab o‘tdi.

Shundan so‘ng navbat ilmiy maʼruzalarga berildi. Jumladan, tibbiyot fanlari doktori, professor Gurbanxan Muslimov, Ozarbayjon Respublikasi Milliy Majlisi deputati, tibbiyot fanlari doktori, professor Rashod Mahmudovning yurak-ishemik kasalliklari, laporaskopik va robot xirurgiyaning dolzarb mavzulari yuzasidan chiqishlari tinglandi.

Anjumanda Rashod Mahmudovga Namangan davlat universiteti faxriy professori unvoni berildi. Mehmonga diplom va esdalik sovg‘alari topshirildi.

Xalqaro tadbir rejasiga ko‘ra, Namangandagi bir qator tibbiyot maskanlarida ozarbayjonlik shifokorlar ishtirokida yuqori texnologik jarrohlik amaliyotlari bajariladi. Jumladan, bu jarayonlarga viloyat ko‘p tarmoqli tibbiyot markazi, viloyat perinatal markazi, Respublika shoshilinch tibbiy yordam ilmiy markazi, endokrinologiya ilmiy-amaliy tibbiyot markazi va kardiologiya ilmiy-amaliy tibbiyot markazlarining viloyatdagi filiallarida kirishildi.

Shuningdek, ozarbayjonlik shifokorlar mahalliy mutaxassislar uchun jarrohlik, kardiologiya, ginekologiya, endokrinologiya, invaziv radiologiya va intensiv terapiya bo‘yicha mahorat darslari o‘tmoqda.