Namangan viloyat teatri Ozarbayjonda gastrol safarida bo‘lib qaytdi

Namangan viloyat musiqali drama teatri Ozarbayjonda gastrol safarlarida bo‘lib qaytdi. Bu haqda “Daryo” muxbiri Azizbek Abduvaliyev xabar bermoqda.

Teatr jamoasi Ozarbayjon davlat akademik musiqali teatrida rejissyor Maʼrufjon Niyozov tomonidan sahnalashtirilgan O‘zbekiston xalq shoiri Oxunjon Hakimov qalamiga mansub “Bu chollar ajib chollar” komediyasini namoyish etdi.

Jamoa mazkur teatr direktori, Ozarbayjonda xizmat ko‘rsatgan sanʼat arbobi Aliismat Lalayev boshchiligidagi hamkasblar bilan yaqin aloqalar o‘rnatishga ham ulgurdi.

“Ikki kun davomida namoyish etilgan spektaklni ozarbayjonlik tomoshabinlar juda yaxshi kutib oldi. Bir-birimizni tarjimonlarsiz ham tushunishimiz mumkinligini gastrol safari davomida yana bir bor anglab yetdik. Spektakl yakunida tomoshabinlarga taqdim etilgan ‘Asssalom ozarlarim‘ qo‘shig‘i esa olqishlar bilan qarshi olindi”, — deydi teatr direktori Nozimjon Toshpo‘latov.

Teatr jamoasi oxirgi bor 2020-yili Qozog‘istonda ijodiy safarda bo‘lib qaytgandi. Endi namanganlik sanʼatkorlar Boshqirdiston, Janubiy Koreya, Singapur va Fransiyadan gastrollar tashkil etish bo‘yicha kelib tushgan takliflarni ko‘rib chiqmoqda.