Shavkat Mirziyoyev Qatar qonun ustuvorligini ta’minlash va korrupsiyaga qarshi kurashish bo‘yicha markazi vasiylik kengashi raisini qabul qildi

Shavkat Mirziyoyev 15-dekabr kuni Qatar qonun ustuvorligini ta’minlash va korrupsiyaga qarshi kurashish bo‘yicha markazi vasiylik kengashi raisi Ali Muhsin al-Marriy boshchiligidagi delegatsiyani qabul qildi. Bu haqda Prezident matbuot xizmati xabar berdi.

Uchrashuv avvalida rais al-Marriy davlatimiz rahbariga Qatar amiri Tamim ibn Hamad Ol Soniyning salomi va eng ezgu tilaklarini yetkazdi. O‘zbekiston bilan Qatar o‘rtasidagi ko‘p qirrali munosabatlar jadal rivojlanib borayotgani qayd etildi. O‘zaro savdo va investitsiyalar hajmi ortmoqda, yirik qo‘shma loyihalar tayyorlanmoqda va amalga oshirilmoqda.

Bo‘lajak muhim xalqaro tadbir – Qatar amiri tashabbusi bilan ta’sis etilgan “Korrupsiyaga qarshi kurashishda ulkan yutuqlar uchun” global mukofotini topshirish marosimini O‘zbekistonda o‘tkazishga tayyorgarlikning borishi ko‘rib chiqildi.

Korrupsiyaga qarshi kurashish sohasida amaliy hamkorlikni yanada kengaytirish, tajriba almashish va qo‘shma ta’lim dasturlarini amalga oshirishdan ikki tomon ham manfaatdor ekani tasdiqlandi.