Makroiqtisodiy va hududiy tadqiqotlar instituti Toshkentdagi yirik supermarketlarda oziq-ovqat mahsulotlari narxini o‘rgandi.
Qayd etilishicha, institut mutaxassislari tomonidan dekabr oyida poytaxtdagi yirik supermarketlarda 21 nomdagi oziq-ovqat mahsulotlari narxining o‘zgarishi ko‘rib chiqilgan.
Natijada 8 xil mahsulot bo‘yicha o‘tgan oydagiga nisbatan minimal narxlar pasaygani aniqlangan. Xususan, oq karam 22 foizga, guruch 15,6 foizga, qizil sabzi 10 foizga, kungaboqar yog‘i 7,4 foizga, sariq piyoz 6,8 foizga, margarin 6,6 foizga, limon 5,6 foizga hamda lavlagi 5,1 foizga pasaygan.
Bundan tashqari, 4 nomdagi mahsulot narxlari oshgan. “Ayniqsa, pomidor va bodring narxining oshishi yaqqol seziladi. Shuni ta’kidlash kerakki, xuddi shunday tendensiya o‘tgan yilda ham kuzatilgandi. Bu esa ushbu mahsulotlarni bozorga etkazib berishda mavsumiy omillarning ta’siri borligidan dalolat beradi”, — deyiladi xabarda.
Tahlillarga ko‘ra, 9 nomdagi mahsulotning eng past narxlari o‘zgarishsiz qolgan. Ularning orasida grechka, sut, bug‘doy uni kabilar bor.
Eslatib o‘tamiz, may oyida O‘zbekiston Markaziy banki 2023-yil birinchi choragi uchun “Iste’mol kayfiyati sharhi”ni e’lon qilgandi. Tadqiqotda respondentlarning daromadlari va xarajatlari, ularning jamg‘armaga moyilligi, shuningdek, kelajakdagi ehtiyojlari tahlil qilingan.
Qayd etilishicha, o‘tgan davrda iste’mol kayfiyat indeksi 2022-yilning IV choragiga nisbatan 2,3 bandga kamayib, 23,9 bandni tashkil etgan.
Izoh (0)