Toshkent shahrida giyohvandlik moddalari va kuchli taʼsir qiluvchi dorilarni noqonuniy saqlayotganlar ushlandi, deb xabar bermoqda IIBB axborot xizmati.
Qayd etilishicha, poytaxtda amalga oshirilayotgan tezkor-profilaktik tadbirlarning “Dolzarb qirq kunligi” davomida poytaxt IIBB va boshqa huquqni muhofaza qiluvchi organlar bilan hamkorlikda giyohvandlik vositalari va kuchli taʼsir qiluvchi dori vositalarini noqonuniy muomalasiga chek qo‘yildi.
Joriy yilning 6-dekabr kuni Mirzo Ulug‘bek tumanida 2001-yilda tug‘ilgan Muxammadiyev Sharifjon Shuxrat o‘g‘li boshqaruvidagi Spark xolislar ishtirokida tekshirilganda 173 dona “Regapen” nomli hamda 160 dona “Aminometil” nomli kuchli taʼsir qiluvchi dori vositalari borligi aniqlanib, ashyoviy dalil sifatida rasmiylashtirib olindi.
Shu kuni Uchtepa tumanida 1994-yilda tug‘ilgan Abdukayumov Xusniddin Shamsiddinovich boshqaruvidagi Nexia-3 to‘xtatilib, xolislar ishtirokida tekshirilganda avtomashina salonidan 32 dona “Tropikamid” nomli kuchli taʼsir qiluvchi dori vositalari borligi aniqlandi va ashyoviy dalil sifatida rasmiylashtirib olindi.
Shuningdek, Chilonzor tumanida yashovchi 1984-yilda tug‘ilgan Baxmatov Pavel Igorevichning xonadoni xolislar ishtirokida tekshirilganda 150 gramm sintetik giyohvandlik vositasi, elektron tarozi, qadoqlashga mo‘ljallangan paketlar hamda giyohvandlik vositalarini isteʼmol qilishga mo‘ljallangan turli vositalar aniqlanib, ashyoviy dalil sifatida rasmiylashtirib olindi.
8-dekabr kuni Bektemir tumanidagi “Sharq” YPX maskanida 1982-yilda tug‘ilgan Urinbayev Ikromiddin Muxamadaliyevich boshqaruvidagi Cobalt to‘xtatilib, xolislar ishtirokida tekshirilganda 8 gramm gashish giyohvandlik vositasi aniqlanib, ashyoviy dalil sifatida rasmiylashtirib olindi.
9-dekabr kuni Uchtepa tumanida 1996-yilda tug‘ilgan Yunusov Temur Timurovich to‘xtatilib, xolislar ishtirokida tekshirilganda yonidan 19 dona bo‘laklarga qadoqlangan sintetik giyohvandlik vositalari borligi aniqlanib, ashyoviy dalil sifatida rasmiylashtirib olindi.
Barcha holatlar yuzasidan to‘plangan hujjatlar o‘rnatilgan tartibda ko‘rib chiqilishi uchun tergov bo‘limiga taqdim etilgan. Tergov yakuni bo‘yicha qonuniy qaror qabul qilinishi taʼminlanadi.
Izoh (0)