Donald Trampning prezidentlik muddati tugashi bilan Oq uydan Rossiyaning AQSHdagi prezidentlik saylovlariga aralashuvi haqidagi o‘ta maxfiy ma’lumotlar saqlanadigan papka g‘oyib bo‘ldi. O‘shandan beri u topilmadi. Bu haqda manbalarga tayanib, CNN xabar berdi.
Yo‘qotilgan ma’lumotlar AQSH va uning ittifoqchilarining milliy xavfsizlik sirlarini o‘z ichiga oladi. CNN manbalarining aytishicha, razvedka idoralari ma’lumotlarning yo‘qolishini juda jiddiy qabul qilgan va 2022-yilda Senat razvedka qo‘mitasi rahbarlariga yetishmayotgan materiallar va hukumatning uni qayta tiklash bo‘yicha harakatlari haqida ma’lumot bergan.
CNN suhbatdoshlarining aytishicha, papkada AQSH va uning NATOdagi ittifoqchilari tomonidan ruslar va rus agentlari haqida to‘plangan, saralanmagan razvedka ma’lumotlari mavjud. Bundan tashqari, papkada AQSH hukumatining 2016-yilgi prezidentlik saylovlarida Trampga g‘alaba qozonishida Rossiya yordam bergani haqidagi versiyasiga asos bo‘lgan manbalar va usullar haqida ma’lumotlar bor edi.
Yo‘qolgan razvedka ma’lumotlari shu qadar maxfiy ediki, Kongress a‘zolari va ularning o‘ta maxfiy ruxsatga ega yordamchilari ma’lumotlarni faqat Virjiniyadagi Markaziy razvedka boshqarmasi shtab-kvartirasida o‘qishlari mumkin edi.
Papka yo‘qolishidan avval Federal qidiruv byurosining Rossiya bo‘yicha tergovi haqidagi ma’lumotlarning bir qismini maxfiylikdan chiqarishni istagan Trampning buyrug‘iga binoan Oq uyga olib kelingan. Papka Respublikachilar partiyasi vakillari tomonidan o‘rganilib, nashrga tayyorlangan versiyadan eng nozik ma’lumotlar kesib tashlangan. Bu jarayon Oq uy apparatining o‘sha paytdagi rahbari Mark Medouz nazorati ostida amalga oshirilgan, deb xabar bermoqda CNN.
Ta’kidlanishicha, Donald Tramp ma’muriyatining yuqori martabali mulozimlari prezidentga razvedka ma’lumotlarini tarqatishiga to‘sqinlik qilishga uringan. Vazifasini tark etishdan bir kun oldin Tramp papkaning aksariyat mazmunini oshkor qilish to‘g‘risida buyruq chiqargan. Oq uy o‘ng qanot jurnalistlar va ba’zi respublikachilarga tarqatilishi rejalashtirilgan hujjatning tahrirlangan versiyasining bir nechta nusxalarini yaratgan, ammo jarayon tezda bekor qilingan va yuborilgan nusxalar Oq uy advokatlarining ko‘rsatmasi bilan shoshilinch ravishda olib tashlangan.
Hujjatning nashrga tayyorlangan yakuniy varianti Jo Bayden inauguratsiyasidan bir necha daqiqa oldin AQSH Adliya vazirligiga topshirilgan. Adliya vazirligi Trampning buyrug‘iga qaramay, hech qachon ma’lumotlarni e’lon qilmagan. Shu bilan birga, Oq uydan tahrir qilinmagan ma’lumotlardan iborat papka g‘oyib bo‘lgan.
Izoh (0)