Toshkent viloyatida ko‘katlar ichida pirotexnika vositalari yashirilgani fosh bo‘ldi. Bu haqda viloyat bojxona boshqarmasi matbuot xizmati xabar berdi.
Ma’lum qilinishicha, Toshkent viloyati bojxona boshqarmasi kontrabandaga qarshi kurashish bo‘limi, DXX va IIV tezkor xodimlari bilan hamkorlikda hamda yo‘l-patrul xizmati xodimlari yordamida keng qamrovli tezkor tadbir o‘tkazilgan.
Tadbir davomida Toshkent viloyati “Chinor” yo‘l-patrul xizmati maskanida, fuqaro boshqaruvidagi Kia rusumli yuk avtotransport vositasi to‘xtatilib, ko‘zdan kechirilgan.
Tekshiruv davomida xodimlarni chalg‘itish maqsadida avtotransport yukxonasining oldi qismiga xufiyona tarzda ko‘katlar ostida 9 dona karton qutilarda pirotexnika vositalari yashirilgani aniqlangan. Surishtiruv ishlari davomida ushbu pirotexnika vositalari xorijda ishlab chiqarilgan va chetdan noqonuniy olib kirilgani maʼlum bo‘lgan.
Dastlabki hisob-kitoblarga ko‘ra, aniqlangan salkam 86 ming dona pirotexnika vositalarining umumiy qiymati 200 million so‘mdan oshmoqda. Hozirda holat yuzasidan surishtiruv ishlari olib borilmoqda.
Avvalroq Namangan viloyati Uychi tumanida 31 million so‘mlik pirotexnika buyumlarini sotayotgan shaxslar ushlangani to‘g‘risida xabar berilgandi. Shuningdek, Angrenda Toshkentga ketayotgan Mercedes-Benz ichidan 250 ming donaga yaqin pirotexnika vositalari topilgan edi.
Izoh (0)