Toshkent shahri va beshta viloyatdagi cheklovlar kiritilgan gaz zapravkalar faoliyatini qisqa fursatda tiklash maqsadida tayyorgarlik ishlari amalga oshirilmoqda. Bu haqda “Hududgazta’minot” matbuot xizmati xabar berdi.
Qayd etilishicha, “Hududgaztaʼminot” tomonidan hozirgi vaqtda tabiiy gazni teng taqsimlash va isteʼmolchilarga bir maromda yetkazib berish bo‘yicha barcha zaruriy choralar ko‘rilmoqda. Tabiiy gaz to‘liq hajmda yetkazib berilyapti, yetishmovchilik kuzatilmayapti. Ammo ayrim joylarda isteʼmol ortgani sababli gaz bosimi pasayishi kuzatilmoqda va isteʼmolchilar tomonidan murojaatlar kelib tushmoqda.
Muammolar kuzatilgan joylarda gaz taʼminotini yaxshilash borasida soha mutaxassislari tomonidan barcha kerakli ishlar davom ettirilmoqda. 2023-yilning 13-dekabr kuni gaz taʼminoti tashkilotlari tomonidan aholi va ulgurji isteʼmolchilarga 113,5 million kub metr tabiiy gaz yetkazib berildi. Bundan tashqari, suyultirilgan gaz isteʼmolchilariga 2223 tonna yoqilg‘i yetkazilgan.
“Ayni vaqtda cheklovlar kiritilgan poytaxt, Samarqand, Toshkent, Andijon, Namangan va Farg‘ona viloyatlaridagi AGTKSHlar faoliyatini qisqa fursatda tiklash maqsadida tayyorgarlik ishlari amalga oshirilmoqda”, — deyiladi xabarda.
Hududlarda avariya holatlari kuzatilganda, mutaxassislar joyiga yuborilmoqda va ular muammolarni bartaraf etishmoqda.
Eslatib o‘tamiz, aholi isteʼmolchilarida uzilishlarning oldini olish maqsadida 13-dekabr kuni poytaxt, Samarqand, Toshkent, Andijon, Namangan va Farg‘ona viloyatlaridagi AGTKSHlarning faoliyatiga qo‘shimcha cheklovlar kiritilgandi. “Hududgaztaʼminot” hozirgi vaqtda belgilangan grafik bo‘yicha 1179 tadan 547 AGTKSH ishlayotganini ma’lum qilgandi.
Izoh (0)