Toshkent viloyatida qiymati 356,4 million so‘m bo‘lgan poytaxtga olib o‘tilayotgan 800 ming dan ortiq pirotexnika ushlab qolindi. Bu haqda viloyat IIBB axborot xizmati xabar berdi.
Qayd etilishicha, tezkor-profilaktik tadbirlarning dolzarb 40 kunligi doirasida viloyat IIBB va huquqni muhofaza qiluvchi organlar bilan hamkorligida pirotexnika vositalarini muomalaga kiritilishining oldini olish bo‘yicha nazorat-reyd tadbirlari kuchaytirilgan.
Misol uchun, kuni kecha Ohangaron tumanida Vodiy-Toshkent yo‘nalishi bo‘ylab harakatlanib kelayotgan Isuzu yuk mashinasi hududiy IIB, DXX va bojxona xodimlari tomonidan o‘rnatilgan tartibda tekshirildi. Natijada daraxt ko‘chatlari ostiga berkitilgan karton qutilarga joylashtirilgan qiymati 144 mln so‘m bo‘lgan pirotexnika vositalari borligi aniqlangan va daliliy ashyo sifatida hujjatlashtirilib olindi.
Umuman, mazkur yo‘nalishda o‘tkazilgan tezkor-profilaktik tadbirlar davomida turli hajm va ko‘rinishdagi umumiy qiymati 356,4 mln so‘m bo‘lgan 805 ming dona pirotexnika vositalari aniqlangan va qonuniy tartibda muomaladan olingan.
Hududda kriminogen vaziyat barqarorligini taʼminlash maqsadiga qaratilgan mazkur yo‘nalishdagi nazorat tadbirlari davom etmoqda.
Izoh (0)