Farg‘ona tumanida 132 ming dona “Britanik” nomli pirotexnika vositalarini xonadonida saqlagan shaxs aniqlandi. Bu haqda Farg‘ona viloyati IIB axborot xizmati xabar berdi.
Ma’lum qilinishicha, Farg‘ona tumani IIB xodimlari tomonidan profilaktik tadbirlar olib borilgan. Tadbir davomida “Xo‘ja Ahmad Vale” MFYda yashovchi O.Z.ning yashash xonadoni xolislar ishtirokida ko‘zdan kechirilganda, taxminiy narxi 24 million so‘m miqdorida bo‘lgan 132 ming dona “Britanik” nomli pirotexnika vositalari topilgan.
Holat yuzasidan O.Z.ga nisbatan Ma’muriy javobgarlik to‘g‘risidagi kodeksning 185-moddasi prim 1-moddasi (pirotexnika buyumlarining qonunga xilof muomalasi) bilan maʼmuriy javobgarlikka tortish chorasi ko‘rilgan.
Avvalroq Namangan viloyati Uychi tumanida 31 million so‘mlik pirotexnika buyumlarini sotayotgan shaxslar ushlangani to‘g‘risida xabar berilgandi. Shuningdek, Angrenda Toshkentga ketayotgan Mercedes-Benz ichidan 250 ming donaga yaqin pirotexnika vositalari topilgan edi.
Izoh (0)