Oliy Majlis Qonunchilik palatasi spikeri o‘rinbosari Alisher Qodirov O‘zbekistonda tirbandliklarning oldini olish uchun xususiy transport vositalar maqomini hal qilish kerakligi haqida gapirdi.
Uning aytishicha, xususiy transport masalasidagi maqomni hal qilinmas ekan, jamoat transportida qancha harakat qilishganidan qat’i nazar ko‘zlagan maqsadga yetib bo‘lmaydi.
“O‘zbekistonda so‘nggi 10 yil ichida xususiy transport besh barobarga ko‘payganini hisobga oladigan bo‘lsak — bu katta bir tahdidga aylanishni boshladi. Biz hali Jahon savdo tashkilotining (JST) protokoliga uyg‘unlashishni boshlaganimiz yo‘q hali. Ertaga JSTning platformasiga kirgandan keyin mashinalar yana ham imkoniyatli bo‘ladi va O‘zbekistondagi bugungi tirbandlik masalasi aniq iqtisodiyotning, jamoatchilik harakatining katta bir muammosiga aylanadi. Hoziroq o‘zi muammoga aylandi”, — deydi Alisher Qodirov.
Spiker o‘rinbosari bu kabi holatning oldini olish uchun Xitoy tajribasini misol qilib keltirdi.
U yerda ham avtomashinani sotib olish qiyin emas, narxini o‘zi belgilab ololmaydi, chunki Jahon savdo tashkilotining talablari bor. Lekin avtomobilga xizmat ko‘rsatish va undan foydalanish bilan bog‘liq bo‘lgan xizmatlar judayam qimmat hisoblanadi. “Parkovka” bo‘lsin yoki soliqlar joriy qilish orqali, pullik yo‘lllar orqali — avtomobilni sotib olish oson, lekin undan foydalanish qimmatga aylangan. Singapurda ham xuddi shunday. U yerda ham xususiy transportdan foydalanishni qimmat qilish hisobiga tirbandliklarni hal qilgan, — deydi Qodirov.
Alisher Qodirov O‘zbekistonni ham yaqin 5-6 yil ichida xuddi shunday juda katta muammo kutayotganini hisobga olib, transport vazirga transportni rivojlantirish konsepsiyasida aynan shu masalalarga hozirdan e’tibor berishni, xususiy transportning maqomi bo‘yicha jiddiy takliflar tayyorlashni taklif qildi.
Oktyabr oxirlarida Toshkent shahrida tirbandlikning oldini olish uchun qanday ishlarni amalga oshirish rejalashtirilgani to‘g‘risida ma’lumot berilgandi.
Izoh (0)