Олий Мажлис Қонунчилик палатаси спикери ўринбосари Алишер Қодиров Ўзбекистонда тирбандликларнинг олдини олиш учун хусусий транспорт воситалар мақомини ҳал қилиш кераклиги ҳақида гапирди.
Унинг айтишича, хусусий транспорт масаласидаги мақомни ҳал қилинмас экан, жамоат транспортида қанча ҳаракат қилишганидан қатъи назар кўзлаган мақсадга етиб бўлмайди.
“Ўзбекистонда сўнгги 10 йил ичида хусусий транспорт беш баробарга кўпайганини ҳисобга оладиган бўлсак — бу катта бир таҳдидга айланишни бошлади. Биз ҳали Жаҳон савдо ташкилотининг (ЖСТ) протоколига уйғунлашишни бошлаганимиз йўқ ҳали. Эртага ЖСТнинг платформасига киргандан кейин машиналар яна ҳам имкониятли бўлади ва Ўзбекистондаги бугунги тирбандлик масаласи аниқ иқтисодиётнинг, жамоатчилик ҳаракатининг катта бир муаммосига айланади. Ҳозироқ ўзи муаммога айланди”, — дейди Алишер Қодиров.
Спикер ўринбосари бу каби ҳолатнинг олдини олиш учун Хитой тажрибасини мисол қилиб келтирди.
У ерда ҳам автомашинани сотиб олиш қийин эмас, нархини ўзи белгилаб ололмайди, чунки Жаҳон савдо ташкилотининг талаблари бор. Лекин автомобилга хизмат кўрсатиш ва ундан фойдаланиш билан боғлиқ бўлган хизматлар жудаям қиммат ҳисобланади. “Парковка” бўлсин ёки солиқлар жорий қилиш орқали, пуллик йўлллар орқали — автомобилни сотиб олиш осон, лекин ундан фойдаланиш қимматга айланган. Сингапурда ҳам худди шундай. У ерда ҳам хусусий транспортдан фойдаланишни қиммат қилиш ҳисобига тирбандликларни ҳал қилган, — дейди Қодиров.
Алишер Қодиров Ўзбекистонни ҳам яқин 5-6 йил ичида худди шундай жуда катта муаммо кутаётганини ҳисобга олиб, транспорт вазирга транспортни ривожлантириш концепциясида айнан шу масалаларга ҳозирдан эътибор беришни, хусусий транспортнинг мақоми бўйича жиддий таклифлар тайёрлашни таклиф қилди.
Октябрь охирларида Тошкент шаҳрида тирбандликнинг олдини олиш учун қандай ишларни амалга ошириш режалаштирилгани тўғрисида маълумот берилганди.
Изоҳ (0)