Qirg‘izistonda deputat Kamila Taliyeva oilada uchinchi farzand tug‘ilgani uchun nafaqa berishni taklif qilmoqda. U bu taklifni 14-dekabr kuni Jogorku Kenesh yig‘ilishida bildirgan, deya xabar berdi AKIpress.
Deputat mamlakatda tug‘ilish yil sayin kamayib, demografik inqiroz avj olayotganini ta’kidladi. Masalan, 2019-yilda 173 ming, 2020-yilda 158 ming, 2021-yilda 150 ming bola tug‘ilgani qayd etildi. Taliyeva oilalarni uchinchi farzand ko‘rishga rag‘batlantirish va 3 yilgacha “Altin bala” (“Oltin bola”) nafaqasini berishni taklif qildi.
“Biz variantlarni muhokama qilishga tayyormiz. Bu dasturni baland tog‘li va chekka chegaradagi qishloqlarda sinov rejimida joriy etishni taklif qilaman. Demak, 2025-yilning 1-yanvaridan boshlab chegara hududlarida nafaqalar oilaviy ahvolidan qat’iy nazar, ortiqcha byurokratiyasiz, barcha hujjatlarsiz barchaga berilishi mumkin. 2026-yil 1-yanvardan boshlab baland tog‘li va chekka hududlarda loyihani amalga oshirishni boshlash mumkin”, — degan Taliyeva.
Izoh (0)