Shavkat Mirziyoyev bugun, 1-dekabr kuni Dubay shahrida BMTning Iqlim o‘zgarishi bo‘yicha konferensiyada nutq so‘zlaydi.
Dunyoning 140 dan ortiq davlat va hukumat rahbarlari ishtirok etayotgan konferensiyaning kun tartibiga ko‘ra, O‘zbekiston prezidenti katta tadbirning kirish qismida, aniqrog‘i BAA, Saudiya Arabistoni, Misr, Qatar kabi davlat rahbarlaridan keyin chiqish qiladi. O‘zbekistonga Markaziy Osiyo davlatlari ichidan birinchi bo‘lib so‘z berilgan.
Davlat rahbari BAA prezidenti Shayx Muhammad bin Zoid al-Nahayonning taklifiga binoan 30-noyabr kuni Dubayga yetib borgandi. Tashrif doirasida davlat rahbari global iqlim sammitining yalpi sessiyasida nutq so‘zlashidan tashqadi, xorijiy mamlakatlarning davlat va hukumatlari, xalqaro tashkilotlar va yetakchi kompaniyalar rahbarlari bilan qator uchrashuv va muzokaralar o‘tkazishi ham ko‘zda tutilgan.
Prezident matbuot kotibi bergan xabarga ko‘ra, Shavkat Mirziyoyev konferensiyada O‘zbekiston milliy, mintaqaviy va global darajada iqlim o‘zgarishiga qarshi kurashni kuchaytirish yuzasidan qator taklif va tashabbuslarni ilgari suradi. Shuningdek, O‘zbekiston BAA rahbariyati tomonidan COP-28 raisi sifatida ilgari surilayotgan muhim tashabbuslarni qo‘llab-quvvatlaydi.
Dunyoning deyarli barcha mamlakatlari, nufuzli xalqaro tashkilotlar va fuqarolik jamiyati vakillari to‘planadigan ushbu forum iqlim o‘zgarishiga qarshi kurashish va uning oqibatlarini yumshatish, iqlim bo‘yicha strategiyalar va “yashil” energetikaga o‘tishni moliyalashtirish borasidagi xalqaro saʼy-harakatlarni birlashtirishda g‘oyat muhim ahamiyatga ega.
Izoh (0)