Prezident imzolagan qonun bilan O‘zbekiston va Qozog‘iston o‘rtasida ittifoqchilik munosabatlari to‘g‘risidagi shartnoma ratifikatsiya qilindi. Bu haqda Telegram’dagi “Huquqiy axborot” kanali xabar berdi.
Shartnomaning asosiy maqsadi ikki mamlakat mustaqilligi, suvereniteti, hududiy yaxlitligini va barqaror iqtisodiy rivojlanishini yanada mustahkamlashga qaratilgan davlatlararo munosabatlarning yangi bosqichini shartnoma-huquqiy jihatdan mustahkamlashdan iborat.
Shartnoma tashqi siyosat, mudofaa va xavfsizlik, migratsiya, sanoat kooperatsiyasini rivojlantirish, transchegaraviy suv resurslaridan oqilona foydalanish bo‘yicha qo‘shma chora-tadbirlarni qabul qilish, parlamentlar, siyosiy partiyalar va jamoat tashkilotlari o‘rtasidagi aloqalarni mustahkamlash kabi sohalarda yaqin hamkorlikni nazarda tutadi.
Shartnoma ilovasida davlat rahbarlari boshchilik qiladigan O‘zbekiston va Qozog‘iston oliy davlatlararo kengashi to‘g‘risidagi nizom keltirilgan.
Oliy Majlis Senati 25-noyabr kuni mazkur shartnomani ratifikatsiya qilishga doir qonunni maʼqullagan edi.
Eslatib o‘tamiz, noyabr boshlarida Prezident tomonidan imzolangan qonun bilan Turkiy investitsiya jamg‘armasini taʼsis etish to‘g‘risidagi bitim ratifikatsiya qilingandi.
Izoh (0)