Шавкат Мирзиёев бугун, 1 декабрь куни Дубай шаҳрида БМТнинг Иқлим ўзгариши бўйича конференцияда нутқ сўзлайди.
Дунёнинг 140 дан ортиқ давлат ва ҳукумат раҳбарлари иштирок этаётган конференциянинг кун тартибига кўра, Ўзбекистон президенти катта тадбирнинг кириш қисмида, аниқроғи БАА, Саудия Арабистони, Миср, Қатар каби давлат раҳбарларидан кейин чиқиш қилади. Ўзбекистонга Марказий Осиё давлатлари ичидан биринчи бўлиб сўз берилган.
Давлат раҳбари БАА президенти Шайх Муҳаммад бин Зоид ал-Наҳаённинг таклифига биноан 30 ноябрь куни Дубайга етиб борганди. Ташриф доирасида давлат раҳбари глобал иқлим саммитининг ялпи сессиясида нутқ сўзлашидан ташқади, хорижий мамлакатларнинг давлат ва ҳукуматлари, халқаро ташкилотлар ва етакчи компаниялар раҳбарлари билан қатор учрашув ва музокаралар ўтказиши ҳам кўзда тутилган.
Президент матбуот котиби берган хабарга кўра, Шавкат Мирзиёев конференцияда Ўзбекистон миллий, минтақавий ва глобал даражада иқлим ўзгаришига қарши курашни кучайтириш юзасидан қатор таклиф ва ташаббусларни илгари суради. Шунингдек, Ўзбекистон БАА раҳбарияти томонидан СОР-28 раиси сифатида илгари сурилаётган муҳим ташаббусларни қўллаб-қувватлайди.
Дунёнинг деярли барча мамлакатлари, нуфузли халқаро ташкилотлар ва фуқаролик жамияти вакиллари тўпланадиган ушбу форум иқлим ўзгаришига қарши курашиш ва унинг оқибатларини юмшатиш, иқлим бўйича стратегиялар ва “яшил” энергетикага ўтишни молиялаштириш борасидаги халқаро саъй-ҳаракатларни бирлаштиришда ғоят муҳим аҳамиятга эга.
Изоҳ (0)