Қорақалпоғистоннинг Қораўзак ва Беруний туманларида қуввати 200 МВт бўлган шамол электр станциясини ҳамда қуввати 100 МВт бўлган электр энергиясини сақлаш тизимини қуриш бўйича ўтказилган тендер танловида ғолиб эълон қилинди. Бу ҳақда “Дарё” мухбири хабар бермоқда.
“Ўзбекистон миллий электр тармоқлари” АЖ бўлим бошлиғи Фазлиддин Шарофиддиновнинг айтишича, тендерда ғолиб бўлган инвестор шамол электр станциясини лойиҳалаштиради, молиялаштиради ва бошқаради.
Ушбу лойиҳага дастлаб 2022 йилда старт берилган эди. Тендер савдоларининг биринчи босқичи 2022 йилнинг июль ойида муваффақиятли амалга оширилган. Дастлаб 12 та компаниядан таклиф олинган. Баҳолаш жараёнида 10 та компаниянинг тажриба ва малакаси етарли, деб топилган ҳамда тендернинг иккинчи босқичига йўлланма берилган.
Тендернинг иккинчи босқичига жорий йилнинг апрель ойида старт берилган бўлса, бугун иштирокчиларнинг таклифларини кўриб чиқиш тадбири бўлиб ўтди, — деди Фазлиддин Шарофиддинов.
Маъсулнинг алоҳида таъкидлашича, мазкур лойиҳа ишга туширилса, Хоразм ва Қорақалпоғистоннинг электр энергияга бўлган истеъмолининг ярмини таъминлаши мумкин.
Лойиҳани 2025 йилда ишга тушириш режалаштирилган. Қиймати 220 миллион доллар деб баҳоланган. Тўғридан-тўғри инвестиция бўлгани учун банкларга кредитни қайтаришни қурувчи компания кафолатлайди. Давлат ҳеч қандай кредитни қайтариш мажбуриятини олмайди, фақатгина 25 йил давомида ишлаб чиқарилган электр энергиясини сотиб олиш билан кифояланади.
Ғолиб бўлган ACWA POWER-Saudi Listed Joint Stock Company (Саудия Арабистони) компанияси 1 кВт.соат учун 2,9 сент билан шамол ва электр энергиясини сақлаш учун 4,09 сент таклиф берган.
Шамол электр станциясини қуришлиши йилига 250 миллион метр кубгача бўлган табиий газни тежашга хизмат қилади, — деди Ўзбекистон миллий электр тармоқлари ходими.
Мазкур лойиҳа Европа тикланиш ва тараққиёт банки кўмагида “Умумий қуввати 200 МВт бўлган шамол электр станцияси қуриш лойиҳасини ишлаб чиқиш ва маслаҳат хизматларини кўрсатиш дастури” (EBRD Phase 2) доирасида амалга оширилмоқда.
Уни амалга оширишга 2 та халқаро компания қизиқиш билдирди. Молиявий таклифларнинг очилиш натижалари:
1. ACWA POWER-Saudi Listed Joint Stock Company (Саудия Арабистони) компанияси томонидан шамол электр станциясида ишлаб чиқариладиган 1 кВт·соат электр энергияси ва электр энергиясини сақлаш тизими учун 4,09 АҚШ сенти таклиф қилинди.
2. Abu Dhabi Future Energy Company PJSC – Masdar (БАА) компанияси томонидан шамол электр станциясидан ишлаб чиқариладиган 1 кВт соат электр энергияси ва электр энергиясини сақлаш тизими учун 4,99 АҚШ сенти таклиф қилинди.
“Қорақалпоғистон Республикасининг Қораўзак ва Беруний туманларида қуввати 200 МВт бўлган шамол электр станциясини ҳамда қуввати 100 МВт бўлган электр энергиясини сақлаш тизимини қуриш” лойиҳаси доирасида ACWA POWER-Saudi Listed Joint Stock Company компанияси тендернинг дастлабки ғолиби, Abu Dhabi Future Energy Company PJSC – Masdar компанияси тендернинг захира ғолиби, деб эълон қилинди.
Танлов ҳужжатлари яқин кунларда Тендер комиссияси томонидан ЕТТБ маслаҳатчилари иштирокида кўриб чиқилади ва тасдиқланади.
Изоҳ (0)