Irkutsk sudi “angarlik manyak” nomi bilan tanilgan Mixail Popkovni yana uch ayolni o‘ldirganlikda aybdor deb topib, unga 10 yil muddatga ozodlikdan mahrum etish jazosini tayinlandi.
Qayd etilishicha, Popkovning 1997-yilda Jilkino posyolkasida 27 yoshli ayolni, Angar daryosi qirg‘og‘ida 25 yoshli ayolni, shuningdek, 2003-yilda Novo-Leninsk qabristoni hududida 31 yoshli ayolni o‘ldirilishiga aloqadorligi isbotlangan.
Bu Popkov uchun to‘rtinchi hukm bo‘lib, ular orasida ikkita umrbod qamoq jazosi ham bor.
Yanvar oyida 81 nafar ayolni o‘ldirgani uchun ikki marta umrbod qamoq jazosiga hukm qilingan Mixail Popkov Ukrainadagi urushda ishtirok etmoqchiligini aytgandi. U “Vesti Irkutsk” gazetasiga yozgan sharhida “armiyaga borishni orzu qilishini” aytgan. Shu bilan birga, Popkov qishda sovuqda urushga borishni xohlamasligini bildirgan. U urushda qatnashish uchun kerakli bo‘lgan ko‘nikmalarni tez o‘rganishini ta’kidlagan.
Sobiq militsioner Popkov 2012-yilda qo‘lga olingan. 2015-yilining yanvar oyida Irkutsk viloyat sudi Mixail Popkovni 22 ta qotillikda aybdor deb topib, bir umrlik qamoq jazosiga hukm qilgan. 2017-yilining mart oyida sud Mixail Popkovni yana 60 qotillikda aybdor deb topdi. Unga har bir qotillik bo‘yicha bir umrlik qamoq jazosi tayinlangan.
Izoh (0)