Иркутск суди “ангарлик маняк” номи билан танилган Михаил Попковни яна уч аёлни ўлдирганликда айбдор деб топиб, унга 10 йил муддатга озодликдан маҳрум этиш жазосини тайинланди.
Қайд этилишича, Попковнинг 1997 йилда Жилкино посёлкасида 27 ёшли аёлни, Ангар дарёси қирғоғида 25 ёшли аёлни, шунингдек, 2003 йилда Ново-Ленинск қабристони ҳудудида 31 ёшли аёлни ўлдирилишига алоқадорлиги исботланган.
Бу Попков учун тўртинчи ҳукм бўлиб, улар орасида иккита умрбод қамоқ жазоси ҳам бор.
Январь ойида 81 нафар аёлни ўлдиргани учун икки марта умрбод қамоқ жазосига ҳукм қилинган Михаил Попков Украинадаги урушда иштирок этмоқчилигини айтганди. У “Вести Иркутск” газетасига ёзган шарҳида “армияга боришни орзу қилишини” айтган. Шу билан бирга, Попков қишда совуқда урушга боришни хоҳламаслигини билдирган. У урушда қатнашиш учун керакли бўлган кўникмаларни тез ўрганишини таъкидлаган.
Собиқ милиционер Попков 2012 йилда қўлга олинган. 2015 йилининг январь ойида Иркутск вилоят суди Михаил Попковни 22 та қотилликда айбдор деб топиб, бир умрлик қамоқ жазосига ҳукм қилган. 2017 йилининг март ойида суд Михаил Попковни яна 60 қотилликда айбдор деб топди. Унга ҳар бир қотиллик бўйича бир умрлик қамоқ жазоси тайинланган.
Изоҳ (0)