Davlat aktivlarini boshqarish agentligi “Biokimyo” kompaniyasining ustav kapitalidagi 51 foiz davlat aksiyalari sotilganini ma’lum qildi.
Qayd etilishicha, tegishli xususiylashtirish dasturlariga muvofiq, “Biokimyo” ustav kapitalidagi 51 foiz davlat aksiyalar paketi xususiylashtirish bo‘yicha professional konsalting kompaniyasini jalb qilgan holda sotilishi belgilangan. Shunga ko‘ra, Abrau Capital kompaniyasi tanlov asosida xususiylashtirish bo‘yicha konsultant sifatida jalb qilingan.
Konsultant tomonidan xususiylashtirish jarayoni doirasida ham mahalliy, ham xalqaro darajada keng ko‘lamli marketing ishlari amalga oshirildi, jumladan, investitsiya tizerlari konsultantning investorlar tarmog‘i orqali salohiyatli investorlarga (investor sounding) yuborilgan. Natijada 3 ta investordan sotib olish bo‘yicha qiziqish to‘g‘risidagi arizalar (Express of Interest) kelib tushgan.
Talabgorlar xususiylashtirish jarayonida ishtirok etilishini taʼqiqlashi mumkin bo‘lgan maʼmuriy, hakamlik yoki boshqa sud jarayonlarining yo‘qligi hamda Yevropa Ittifoqi va AQSHning, shuningdek, yirik xalqaro moliya institutlarining sanksiyalari ro‘yxatiga kiritilmagani yuzasidan o‘rganilgan.
Kelib tushgan takliflar orasida eng yuqori narx taklifini bildirgan, kelajakda jamiyat faoliyatini barqaror rivojlanishini taʼminlay oladigan va ishlab chiqarish jarayonlarini to‘liq davomiyligini shakllantirishga salohiyatli bo‘lgan Mega comfort business MCHJ, “Biokimyo” AJ ustav kapitalidagi 51 foiz davlat aksiyalar paketini sotib olish uchun qo‘yilgan talablarga to‘liq javob bergan va 118 milliard so‘m sotib olish to‘lovi bilan g‘olib deb topilgan.
“Shu bilan birga, xaridorning narx taklifi konsultant tomonidan hisoblangan korxonaning sotilishi mumkin bo‘lgan indikativ narxlar oralig‘ida joylashgan hamda mustaqil baholovchi tomonidan korxonaning baholangan qiymatidan yuqori”, — deyiladi xabarda.
Korxonani xususiylashtirish natijalari Davlat aktivlarini xususiylashtirish va xususiylashtirish jarayonlarini muvofiqlashtirish davlat komissiyasining tegishli qarori bilan maʼqullangan.
Maʼlumot uchun, Mega comfort business MCHJ Toshkent viloyati, Yangiyo‘l tumanida joylashgan, umumiy ovqatlanish va oziq-ovqat yetkazib berish xizmatlarini ko‘rsatadi. Ustav kapitali — 46,4 milliard so‘m.
Eslatib o‘tamiz, yanvar oyida Davaktiv agentligi “Qo‘qon biokimyo” kompaniyasi ustav kapitalidagi 99,7 foiz davlat aksiyalari paketini 277,0 mlrd so‘mga First Premium Alliance MCHJga sotish bo‘yicha kelishuvga erishilganini maʼlum qilgandi.
Izoh (0)