Давлат активларини бошқариш агентлиги “Биокимё” компаниясининг устав капиталидаги 51 фоиз давлат акциялари сотилганини маълум қилди.
Қайд этилишича, тегишли хусусийлаштириш дастурларига мувофиқ, “Биокимё” устав капиталидаги 51 фоиз давлат акциялар пакети хусусийлаштириш бўйича профессионал консалтинг компаниясини жалб қилган ҳолда сотилиши белгиланган. Шунга кўра, Аbrau Cаptial компанияси танлов асосида хусусийлаштириш бўйича консултант сифатида жалб қилинган.
Консултант томонидан хусусийлаштириш жараёни доирасида ҳам маҳаллий, ҳам халқаро даражада кенг кўламли маркетинг ишлари амалга оширилди, жумладан, инвестиция тизерлари консултантнинг инвесторлар тармоғи орқали салоҳиятли инвесторларга (инвестор соундинг) юборилган. Натижада 3 та инвестордан сотиб олиш бўйича қизиқиш тўғрисидаги аризалар (Express of Interest) келиб тушган.
Талабгорлар хусусийлаштириш жараёнида иштирок этилишини таъқиқлаши мумкин бўлган маъмурий, ҳакамлик ёки бошқа суд жараёнларининг йўқлиги ҳамда Европа Иттифоқи ва АҚШнинг, шунингдек, йирик халқаро молия институтларининг санкциялари рўйхатига киритилмагани юзасидан ўрганилган.
Келиб тушган таклифлар орасида энг юқори нарх таклифини билдирган, келажакда жамият фаолиятини барқарор ривожланишини таъминлай оладиган ва ишлаб чиқариш жараёнларини тўлиқ давомийлигини шакллантиришга салоҳиятли бўлган Mega comfort business МЧЖ, “Биокимё” АЖ устав капиталидаги 51 фоиз давлат акциялар пакетини сотиб олиш учун қўйилган талабларга тўлиқ жавоб берган ва 118 миллиард сўм сотиб олиш тўлови билан ғолиб деб топилган.
“Шу билан бирга, харидорнинг нарх таклифи консультант томонидан ҳисобланган корхонанинг сотилиши мумкин бўлган индикатив нархлар оралиғида жойлашган ҳамда мустақил баҳоловчи томонидан корхонанинг баҳоланган қийматидан юқори”, — дейилади хабарда.
Корхонани хусусийлаштириш натижалари Давлат активларини хусусийлаштириш ва хусусийлаштириш жараёнларини мувофиқлаштириш давлат комиссиясининг тегишли қарори билан маъқулланган.
Маълумот учун, Mega comfort business МЧЖ Тошкент вилояти, Янгийўл туманида жойлашган, умумий овқатланиш ва озиқ-овқат етказиб бериш хизматларини кўрсатади. Устав капитали — 46,4 миллиард сўм.
Эслатиб ўтамиз, январь ойида Давактив агентлиги “Қўқон биокимё” компанияси устав капиталидаги 99,7 фоиз давлат акциялари пакетини 277,0 млрд сўмга First Premium Alliance МЧЖга сотиш бўйича келишувга эришилганини маълум қилганди.
Изоҳ (0)