“Qo‘qon biokimyo” 277 mlrd so‘mga sotilmoqda 

Davaktiv agentligi “Qo‘qon biokimyo” kompaniyasi ustav kapitalidagi 99,7 foiz davlat aksiyalari paketini 277,0 mlrd so‘mga First Premium Alliance MCHJga sotish bo‘yicha kelishuvga erishilganini maʼlum qildi.

Korxonani xususiylashtirish natijalari Davlat mulkini sotishda tender savdolarini o‘tkazish bo‘yicha davlat komissiyasining tegishli qarori bilan maʼqullangan.

“Qo‘qon biokimyo” O‘rta Osiyo hududida eng katta bo‘lgan ozuqa etil spirti ishlab chiqaruvchisidir. 

First Premium Alliance alkogol mahsulotlarini ulgurji va chakana sotishga ixtisoslashgan kompaniya hisoblandi. 

Kompaniyada oziq-ovqat mahsulotlarining xavfsizligi bo‘yicha xalqaro ISO 22000:2005 standarti joriy etilgan. Taʼsischilar Toshkent shahrida alkogol mahsulotlarini ishlab chiqaruvchi yirik zavodga ega. 

Ta’kidlanishicha, kompaniyaning MDH mamlakatlarida yirik distribyutorlik tarmoqlari mavjudligi “Qo‘qon biokimyo” keyingi faoliyatini rivojlantirish, qo‘shimcha infrastruktura yaratish imkoniyatini yaratadi. 

Bugungi kunda Kompaniya Legion, Lavini, Duty Free International Airport kabi yirik riteylik tarmoqlari bilan hamkorlikda faoliyat ko‘rsatib kelmoqda.