21-noyabr kuni vafot etgan O‘zbekistonda xizmat ko‘rsatgan artist, askiya san’ati ustasi Mamasiddiq Sherayev o‘limidan avval 70 kun davomida qattiq kasal bo‘lgani ma’lum bo‘ldi. Bu haqda so‘z ustasi “Chotki tv” YouTube kanaliga bergan intervyusida so‘zlab bergan. Intervyu Mamasiddiq Sherayevning o‘limidan 5 kun avval, 16-noyabr kuni olingan edi.
“Ozgina kasal bo‘lib qoldim, 70 kundan beri yotibman. Bu hayot. Xudo meni ikki marta o‘limdan olib qoldi. Shuning uchun ortimda Allohim turgan ekan men hech narsadan qo‘rqmayman. Joningni ham Xudo oladi, obro‘ni ham Xudo beradi. Shuning uchun boriga shukur qilib, bor mehr-muhabbatimizni Allohga bildirib yuraverishimiz kerak. Odamzod kasal bo‘ladi. Nazar bor. Nazar tufayli 70 kundan beri, mana kasal bo‘lib yotibman. Majlis bo‘ldi, menga yangi mukofot va unvonlar berishdi. Unvon va diplomlarni topshirishayotganida teatrda rosa qarsaklar bo‘ldi. Kimningdir ko‘zi tegdi-da. O‘sha kuni yaxshi edim, ertasi kuni bo‘ldi hamma ish. Hozir menga o‘xshagan san’atkorlar professor, Turon akademiyasining akademigi bo‘lish ham hammasi Xudodan”, — degan Mamasiddiq Sherayev.
Shuningdek, ustoz san’atkor xususiy telekanallar hamda o‘limidan so‘ng uni qanday eslashlari haqida ham gapirib o‘tgan.
“Yoshlarimiz xohlagan ko‘yiga kirib yotibdi. Hozir bir gapni aytaman, balki birovga malol kelar, lekin men xafa bo‘lmayman, chunki aytadiganim to‘g‘ri gap. Xususiy telekanallar “soqqa”ni olyapti-yu, kimni bo‘lsa chiqarib yotibdi. Qani Tavakkal akalar? Komiljon Baratov, Komiljon Otaniyozov, Kamoliddin Rahimov, nechta ustoz san’atkorlar bor. Birorta ustozni yoki maqomni qo‘ymaydi televizorda. Bu ustozlarning ashulalari bizning tanimizga singib ketgan. Hech bo‘lmasa, ertalab soat yettida bir soat qo‘ysa bo‘ladi-ku?
Men o‘tib ketganimdam keyin shunaqa buyuk ustoz bor edi, u “askiya qiroli” edi, deb eslashlarini istayman. Bizdan keyin yana kimdir chiqadi, undan keyin yana kimdir, bu hayot charxpalak”, — degan Mamasiddiq Sherayev.
Izoh (0)