O‘zbekistonda xizmat ko‘rsatgan artist, taniqli suxandon O‘tkir Siddiqov 78 yoshida vafot etdi. Bu haqda shoir Bobur Bobomurod Facebook dagi sahifasi orqali ma’lum qildi.
O‘tkir Siddiqov 1945-yilda Toshkent shahrida tug‘ilgan. Toshkent teatr va rassomchilik sanʼati institutining drama va kino aktyorligi yo‘nalishini tamomlagan. U 1968-yildan “Shodlik” ashula va raqs ansamblida ishlay boshlagan.
O‘tkir Siddiqov boshlovchi sifatida bugungacha 8 mingga yaqin konsert va tadbirlarda qatnashgan. U 250 martadan ortiq turli shahar va mamlakatlardagi gastrol safarlarida boshlovchilik qilgan.
U 1996-yilda O‘zbekistonda xizmat ko‘rsatgan artist unvoni, 2017-yilda “Shuhrat” medali bilan taqdirlangan.
Bobur Bobomurodga ko‘ra, janoza 20-noyabr kuni peshinda “Ko‘kcha” masjidida o‘qiladi.
Izoh (0)