Bugun, 28-oktyabr kuni Toshkent shahridagi O‘zbekiston sanʼat galereyasida qozog‘istonlik rassom Doktor Leyla Mahatning “Tumor” nomli ko‘rgazmasi bo‘lib o‘tdi. Bu haqda “Daryo” muxbiri xabar bermoqda.
Doktor Leyla Mahat — rassom, kurator, galerist. Qozog‘iston Milliy san’at universitetining rangtasvir va haykaltaroshlik kafedrasi professori. Tasviriy san’at bo‘yicha falsafa fanlari doktori. Chenstoxovadagi (Polsha) Yan Dlugosh universitetining “Chizmachilik va rassomlik” kafedrasi professori, “Qulanshi” zamonaviy san’at markazi kuratorlar kengashi raisi.
“Biz yashayotgan ekanmiz, doimo ishonamiz. Hammasi yaxshi bo‘lishiga ishonamiz. Har bir inson sog‘lom va baxtli bo‘lishiga, urushlar sodir bo‘lmasligiga, ofatlar bizdan narida o‘tib ketishiga ishonadi. Bundan ikki yuz, uch yuz, million yil oldin odamlar bunga ishonishgan. Va omadga bo‘lgan ishonchni yanada kuchaytirish maqsadida o‘zimiz uchun turli odatlar va tumorlarni o‘ylab topamiz.
Baxtli raqamlar, haftaning omadli kunlari, tabiat belgilari — yomg‘ir yog‘ishi, to‘lishib borayotgan Oy ...”, — deydi rassom Leyla Mahat.
U asarlari uchun Frans Kafka nomidagi medal, Xalqaro Parlament assambleyasining “Madaniyat va san’atni rivojlantirishdagi xizmatlari uchun” ordeni bilan mukofotlangan. Shuningdek, Leyla Mahat Tasviriy san’at akademiyasining faxriy a’zosi, Yevropa san’at ittifoqi laureatidir.
Ko‘rgazmada rassomning rangtasvir va grafik asarlari namoyish etilgan. Tadbir Qozog‘istonning O‘zbekistondagi elchixonasi bilan hamkorlikda tashkil etilgan.
Izoh (0)