21 ноябрь куни вафот этган Ўзбекистонда хизмат кўрсатган артист, аския санъати устаси Мамасиддиқ Шераев ўлимидан аввал 70 кун давомида қаттиқ касал бўлгани маълум бўлди. Бу ҳақда сўз устаси “Chotki TV” YouTube каналига берган интервьюсида сўзлаб берган. Интервью Мамасиддиқ Шераевнинг ўлимидан 5 кун аввал, 16 ноябрь куни олинган эди.
“Озгина касал бўлиб қолдим, 70 кундан бери ётибман. Бу ҳаёт. Худо мени икки марта ўлимдан олиб қолди. Шунинг учун ортимда Аллоҳим турган экан мен ҳеч нарсадан қўрқмайман. Жонингни ҳам Худо олади, обрўни ҳам Худо беради. Шунинг учун борига шукур қилиб, бор меҳр-муҳаббатимизни Аллоҳга билдириб юраверишимиз керак. Одамзод касал бўлади. Назар бор. Назар туфайли 70 кундан бери, мана касал бўлиб ётибман. Мажлис бўлди, менга янги мукофот ва унвонлар беришди. Унвон ва дипломларни топширишаётганида театрда роса қарсаклар бўлди. Кимнингдир кўзи тегди-да. Ўша куни яхши эдим, эртаси куни бўлди ҳамма иш. Ҳозир менга ўхшаган санъаткорлар профессор, Турон академиясининг академиги бўлиш ҳам ҳаммаси Худодан”, — деган Мамасиддиқ Шераев.
Шунингдек, устоз санъаткор хусусий телеканаллар ҳамда ўлимидан сўнг уни қандай эслашлари ҳақида ҳам гапириб ўтган.
“Ёшларимиз хоҳлаган кўйига кириб ётибди. Ҳозир бир гапни айтаман, балки бировга малол келар, лекин мен хафа бўлмайман, чунки айтадиганим тўғри гап. Хусусий телеканаллар “соққа”ни оляпти-ю, кимни бўлса чиқариб ётибди. Қани Таваккал акалар? Комилжон Баратов, Комилжон Отаниёзов, Камолиддин Раҳимов, нечта устоз санъаткорлар бор. Бирорта устозни ёки мақомни қўймайди телевизорда. Бу устозларнинг ашулалари бизнинг танимизга сингиб кетган. Ҳеч бўлмаса, эрталаб соат еттида бир соат қўйса бўлади-ку?
Мен ўтиб кетганимдам кейин шунақа буюк устоз бор эди, у “аския қироли” эди, деб эслашларини истайман. Биздан кейин яна кимдир чиқади, ундан кейин яна кимдир, бу ҳаёт чархпалак”, — деган Мамасиддиқ Шераев.
Изоҳ (0)