Qurilish va uy-joy kommunal xo‘jaligi vazirligi “Mening birinchi uyim” dasturini amalga oshirish chora-tadbirlari to‘g‘risidagi prezident qarori loyihasini muhokamaga qo‘ydi.
Hujjat loyihasida qayd etilishicha, “Mening birinchi uyim” dasturi Qurilish va uy-joy kommunal xo‘jaligi vazirligi tomonidan Turkiyaning TOKI davlat kompaniyasi bilan hamkorlikda ishlab chiqilgan.
Qaror bilan Toshkent viloyati hokimligi hamda Qurilish va uy-joy kommunal xo‘jaligi vazirligining “Mening birinchi uyim” dasturini birinchi bosqichini tajriba-sinov tariqasida Zangiota tumani “Turkiston” MFYda amalga oshirish to‘g‘risidagi taklifiga rozilik berilmoqda.
Dastur doirasida amalga oshiriladigan qurilish ishlarini muvofiqlashtirish uchun Qurilish va uy-joy kommunal xo‘jaligi vazirligi huzurida davlat muassasasi shaklidagi “Mening birinchi uyim” dasturini amalga oshirish direksiyasi tashkil etiladi.
Belgilanishicha:
- ko‘p kvartirali uy-joylar, yo‘l-transport, muhandislik-kommunikatsiya hamda ijtimoiy infratuzilma obyektlarini samarali joylashtirish, loyihalashtirish hamda qurish ishlarini tashkil etish direksiya tomonidan amalga oshiriladi;
- ko‘p kvartirali uy-joylar, yo‘l-transport, muhandislik-kommunikatsiya hamda ijtimoiy infratuzilma obyektlarini loyihalashtirish va qurish ishlarini amalga oshiradigan tadbirkorlik subyektlari tender savdolari asosida aniqlanadi.
- Dastur doirasida quriladigan uy-joylar aholiga imtiyozli va bozor shartlarda realizatsiya qilinadi;
- imtiyozli uy-joylar oxirgi 5 yil davomida mulk huquqi asosida uy-joyga ega bo‘lmagan oilalarga, 15 foiz miqdorda boshlang‘ich to‘lov asosida 20 yil muddatga bo‘lib-bo‘lib to‘lash shartlarida realizatsiya qilinadi;
- uy-joy sharoitlarini yaxshilashga muhtoj bo‘lgan shaxslarga imtiyozli uy-joylar bo‘yicha boshlang‘ich to‘lovining bir qismini qoplash uchun – qatʼiy belgilangan 32 million so‘m miqdorida, oylik to‘lovlarining bir qismini qoplash uchun – besh yil davomida har oylik qatʼiy belgilangan 1 million so‘m miqdorida davlat budjeti hisobidan subsidiyalar ajratiladi.
Direksiyaga dasturni amalga oshirish doirasida quyidagi huquqlar beriladi:
- tadbirkorlik subyektlari bilan davlat-xususiy sherikchilik bitimlarini tuzish va bitim shartlarini mustaqil belgilash;
- “22626” maxsus hisobvarag‘ini ochish va undagi mablag‘lardan foydalanish.
Quyidagilar dasturni amalga oshirishning moliyalashtirish manbalari etib belgilanmoqda:
- ko‘p kvartirali uy-joylar, yo‘l-transport va muhandislik-kommunikatsiya tarmoqlari, bozor infratuzilmasi obyektlarini loyihalashtirish va qurish, hududlarni obodonlashtirish va ko‘kalamzorlashtirish uchun – direksiya va tadbirkorlik subyektlarining mablag‘lari, tijorat banklarining kreditlari;
- ijtimoiy infratuzilma obyektlari (maktabgacha va umumiy o‘rta taʼlim muassasalari hamda tibbiyot punktlari)ni loyihalashtirish va qurish uchun — davlat budjetidan ajratiladigan mablag‘lar, Tadbirkorlik infratuzilmasini rivojlantirish jamg‘armasi mablag‘lari va qonunchilik hujjatlarida taqiqlanmagan boshqa manbalar. Bunda, ijtimoiy soha obyektlari davlat-xususiy sheriklik asosida qurilganda, moliyalashtirish davlat-xususiy sheriklik to‘g‘risidagi bitimga muvofiq amalga oshiriladi.
Aprel oyida prezident tashabbusi bilan Toshkent viloyatida “Mening birinchi uyim” dasturi boshlanishi to‘g‘risida xabar berilgandi. Unga Zangiota tumanidan 36 gektar yer maydoni ajratilib, ushbu hududni kompleks rivojlantirish loyihasi ishlab chiqilishi aytilgan edi. “Ushbu hududda 2,5 ming oilaga mo‘ljallangan, barcha standartlarga javob beruvchi qulay va energiya tejamkor 58 ta ko‘p qavatli uy-joy barpo etiladi”, — deyilgan xabarda.
Izoh (0)