Qashqadaryo viloyatida sudlar tomonidan 2023-yilning o‘tgan davrida chiqarilgan qarorlarning 60 foizdan ko‘pi ijro qilinmagani, bunga ijro organlarining loqaydligi sabab qilib ko‘rsatilgani xabar berilgandi. Qashqadaryo viloyat sudi axborot xizmati buni rad etib chiqdi.
O‘zAda berilgan xabarga ko‘ra, viloyatda 2023-yilning o‘tgan davrida chiqarilgan jami 868 milliard 117 millionlik 958 ta yoki 60,2 foiz sud qarorlarining ijrosi ta’minlanmagan.
Bu haqda Qashqadaryo viloyati sudi raisi Abduqayum Mahkamov jurnalist va blogerlar bilan bo‘lib o‘tgan matbuot anjumanida ta’kidlagan hamda buni ijro organlarining loqaydligi bilan izohlagan. Sud raisining qo‘shimcha qilishicha, ilgari amaliyotda bunday holat umuman kuzatilmagan.
Viloyat sudi axborot xizmatiga ko‘ra, nashr Abduqayum Mahkamov bergan ma’lumotni noto‘g‘ri talqin qilgan.
2023-yilning 17-noyabr kuni o‘tkazilgan Qashqadaryo viloyati sudlarining 2023-yilning 9 oyi davomidagi faoliyati tahlili hamda sohaga oid muhim va dolzarb masalalarga bag‘ishlangan matbuot anjumanida viloyat sudi raisi Abduqayum Mahkamovning axboroti tinglandi. Mazkur axborotda A.Mahkamov viloyat sudlari qarorlarining ijro ahvoli xususida to‘xtalar ekan, 2023-yilning 9 oyi davomida sud qarorlarining jami 868 milliard 117 million 385 ming 243 so‘mlik 958 ta yoki 60,2 foizi ijrosi ta’minlanmaganligini ta’kidlab o‘tgan.
Mazkur matbuot anjumanida ishtirokchilar tomonidan A.Mahkamovga ushbu mavzuda berilgan savolga A.Mahkamov o‘z vaqtida o‘zaro taqqoslashlar o‘tkazib turilishi va har qanday aytilgan raqamlar statistikadan olinganligini qayd etib o‘tdi.
O‘zA muxbiri O‘.Barotovning xabarida ta’kidlagan “Ushbu holatni A.Mahkamov bugungi kundagi ijro organlarining loqaydligi, ilgarigi amaliyotda bunday holat umuman kuzatilmagani bilan izohladi”, — degan so‘zlari haqiqatdan yiroq ekani bildiriladi. Matbuot anjumani davomida ijro organlari sha’niga putur yetkazadigan bu kabi iboralar ishlatilmadi, — deyiladi mas’ullar izohida.
Mazkur holat haqida jamoatchilikka qo‘shimcha qilgan Bosh prokuratura axborot xizmati rahbari Hayot Shamsutdinov Qashqadaryo viloyati sudlari prokuratura hamda sud organlari o‘rtasida nomuvofiqlik va tushunmovchilik keltirib chiqarishi mumkin bo‘lgan xabarlarni tarqatmaslikni so‘raganini yozdi.
Viloyat sudining qo‘shimcha qilishicha, sudlar va prokuratura organlari mamlakatda qonun ustuvorligini ta’minlash borasida o‘zaro muvofiq holda faoliyat olib boradi.
Ommaviy axborot vositalari vakillari va blogerlardan ikki davlat organi o‘rtasida nomuvofiqlik va tushunmovchilik keltirib chiqarishi mumkin bo‘lgan yuqoridagi kabi haqiqatga to‘g‘ri kelmaydigan xabarlar tarqatmasliklari so‘raladi, — deyiladi viloyat axborot xizmati xabarida.
Izoh (0)