“Uyda yolg‘iz” filmi yulduzi Makoley Kalkin AQSHdagi Shon-sharaf xiyobonida o‘z yulduziga ega bo‘ladi. Yulduzning tantanali “ochilish” marosimi joriy yilning 1-dekabr sanasiga rejalashtirilgan.
Kalkin umumiy hisob bo‘yicha xiyobondagi 2765-yulduzga egalik qiladi. Marosimga aktyorni qo‘llab-quvvatlash uchun uning hamkasblari – “Uyda yolg‘iz” filmida Kevinning onasi rolini ijro etgan aktrisa Ketrin OHara, shuningdek Natasha Lionning tashrif buyurishi kutilmoqda.
Kalkin hamon ko‘pchilik tomonidan sevib tomosha qilinadigan “Uyda yolg‘iz” filmida suratga tushgan vaqti bor-yo‘g‘i 10 yoshda bo‘lgan. Komediyaning olamshumul muvaffaqiyatidan keyin kino tanqidchilari va jurnalistlar Kalkinni Amerikaning eng isteʼdodli yosh aktyori deya taʼriflay boshlaganlar. Biroq oradan ko‘p vaqt o‘tmay Kalkinning ijodiy faoliyatida keskin “qulash” kuzatilgan.
Aktyor keyinchalik “Bak tog‘a”, “Mening qizalog‘im”, “Otalar bilan qanday kelishish kerak” va boshqa ko‘plab filmlarda turli rollarni ijro etgan. Ijodkor shuningdek, “Amerikancha dahshatli hikoya” serialining so‘nggi mavsumi va “Entergalaktik” multserialida ham suratga tushgan.
Izoh (0)