“Уйда ёлғиз” фильми юлдузи Маколей Калкин АҚШдаги Шон-шараф хиёбонида ўз юлдузига эга бўлади. Юлдузнинг тантанали “очилиш” маросими жорий йилнинг 1 декабрь санасига режалаштирилган.
Калкин умумий ҳисоб бўйича хиёбондаги 2765-юлдузга эгалик қилади. Маросимга актёрни қўллаб-қувватлаш учун унинг ҳамкасблари – “Уйда ёлғиз” фильмида Кевиннинг онаси ролини ижро этган актриса Кетрин OHара, шунингдек Наташа Лионнинг ташриф буюриши кутилмоқда.
Калкин ҳамон кўпчилик томонидан севиб томоша қилинадиган “Уйда ёлғиз” фильмида суратга тушган вақти бор-йўғи 10 ёшда бўлган. Комедиянинг оламшумул муваффақиятидан кейин кино танқидчилари ва журналистлар Калкинни Американинг энг истеъдодли ёш актёри дея таърифлай бошлаганлар. Бироқ орадан кўп вақт ўтмай Калкиннинг ижодий фаолиятида кескин “қулаш” кузатилган.
Актёр кейинчалик “Бак тоға”, “Менинг қизалоғим”, “Оталар билан қандай келишиш керак” ва бошқа кўплаб фильмларда турли ролларни ижро этган. Ижодкор шунингдек, “Американча даҳшатли ҳикоя” сериалининг сўнгги мавсуми ва “Интергалактик” мультсериалида ҳам суратга тушган.
Изоҳ (0)