Namangan viloyat bojxona boshqarmasi tomonidan DXX, Milliy gvardiya va ichki ishlar idoralari xodimlari bilan hamkorlikda tezkor tadbir o‘tkazildi. Bu haqda “Daryo” muxbiri Azizbek Abduvaliyev xabar bermoqda.
Foto: Namangan viloyat bojxona boshqarmasi matbuot xizmati
Namangan shahrining Yangi Namangan tumani, “Mustaqillikning besh yilligi” mahallasida o‘tkazilgan tadbir davomida Cobalt avtomobili to‘xtatilib, xolislar ishtirokida ko‘zdan kechirildi. Ushbu jarayonda mashina yukxonasi va o‘rindiqda hech qanday hujjatlari bo‘lmagan 150 million so‘mlik 10 ming quti tamaki mahsulotlari borligi aniqlandi.
Shundan so‘ng tezkor tadbir davom ettirilib, shu tumanda yashovchi fuqaroning xonadoni xolislar ishtirokida ko‘zdan kechirildi. Uning hovlisida qiymati 60 million so‘mlik 3 ming 990 quti tamaki mahsuloti borligi maʼlum bo‘ldi.
O‘tkazilgan mazkur tezkor tadbirda jami 210 million so‘mlik 13 990 quti tamaki mahsuloti daliliy ashyo sifatida vaqtincha saqlovga olindi. Hozirda mazkur holat yuzasidan surishtiruv harakatlari olib borilmoqda.
Maʼlumot uchun, joriy yilning o‘tgan 10 oyi davomida Namanganda amalga oshirilgan shu kabi tadbirlar davomida jami 2 milliard 709 million so‘mlik 320 mingdan ortiq tamaki mahsulotlarining noqonuniy aylanmasiga chek qo‘yildi.
Izoh (0)