“Shovot” chegara bojxona postida xodimlar ikki dona qadimiy bilaguzukni yashirincha olib chiqishga uringan yo‘lovchini to‘xtatib qoldi. Bu haqda Xorazm viloyati bojxona boshqarmasi matbuot xizmati xabar berdi.
Qayd etilishicha, “Shovot” chegara bojxona posti orqali “yashil” yo‘lak orqali harakatlangan ushbu yo‘lovchi 520 grammdan ziyod og‘irlikdagi bilaguzuklarni qo‘l yuki orasida olib chiqishga uringan.
Sanʼatshunoslik ekspertizasi xulosasiga ko‘ra, nikel, mis, qalay va kumush aralashmasidan qo‘ldan ishlangan ushbu bilaguzuklar XX asr boshlariga mansub bo‘lib, tarixiy-badiiy qiymatga ega madaniy boylik hisoblanadi.
Jinoyat ishlari bo‘yicha Shovot tuman sudining qaroriga asosan qadimiy ashyolar davlat egaligiga o‘tkazilgan va Xiva Ichanqalʼa davlat muzey qo‘riqxonasiga topshirilgan.
“Madaniy boyliklarning olib chiqilishi va olib kirilishi to‘g‘risida”gi qonun hamda “Madaniy boyliklarni olib chiqilishi va olib kirilishi to‘g‘risida”gi nizom talablariga muvofiq 50 yil muqaddam va undan ham oldin yaratilgan madaniy boyliklarni O‘zbekiston hududidan olib chiqish mumkin emas.
Bundan oldin Buxoro xalqaro aeroportida qadimiy tangalarni olib chiqmoqchi bo‘lgan erkak to‘xtatib qolingani, Samarqandda Kushonlar davriga oid tangalarni chetga olib chiqib ketmoqchi bo‘lgan fuqaro aniqlangani to‘g‘risida xabar berilgandi.
Izoh (0)