“Шовот” чегара божхона постида ходимлар икки дона қадимий билагузукни яширинча олиб чиқишга уринган йўловчини тўхтатиб қолди. Бу ҳақда Хоразм вилояти божхона бошқармаси матбуот хизмати хабар берди.
Қайд этилишича, “Шовот” чегара божхона пости орқали “яшил” йўлак орқали ҳаракатланган ушбу йўловчи 520 граммдан зиёд оғирликдаги билагузукларни қўл юки орасида олиб чиқишга уринган.
Санъацҳунослик экспертизаси хулосасига кўра, никел, мис, қалай ва кумуш аралашмасидан қўлдан ишланган ушбу билагузуклар ХХ аср бошларига мансуб бўлиб, тарихий-бадиий қийматга эга маданий бойлик ҳисобланади.
Жиноят ишлари бўйича Шовот туман судининг қарорига асосан қадимий ашёлар давлат эгалигига ўтказилган ва Хива Ичанқалъа давлат музей қўриқхонасига топширилган.
“Маданий бойликларнинг олиб чиқилиши ва олиб кирилиши тўғрисида”ги қонун ҳамда “Маданий бойликларни олиб чиқилиши ва олиб кирилиши тўғрисида”ги низом талабларига мувофиқ 50 йил муқаддам ва ундан ҳам олдин яратилган маданий бойликларни Ўзбекистон ҳудудидан олиб чиқиш мумкин эмас.
Бундан олдин Бухоро халқаро аэропортида қадимий тангаларни олиб чиқмоқчи бўлган эркак тўхтатиб қолингани, Самарқандда Кушонлар даврига оид тангаларни четга олиб чиқиб кетмоқчи бўлган фуқаро аниқлангани тўғрисида хабар берилганди.
Изоҳ (0)