O‘zbekistonda 2024-yilda hukumat xususiy sektorda ishlovchi ayollarning homiladorlik va tug‘ish nafaqalari miqdorini uch baravarga qisqartirishni rejalashtirmoqda. Bu haqda kelasi yilgi davlat budjeti loyihasida maʼlum qilindi.
Qayd etilishicha, 2023-yilgi davlat budjetidan xususiy sektordagi homilador ayollarga homiladorlik va tug‘ish nafaqalari uchun 300,7 milliard so‘m ajratilgan. 2024-yilda esa bu ko‘rsatkich 100 milliard so‘mgacha kamayadi.
Oliy Majlis Qonunchilik palatasi deputati Doniyor G‘aniyevning aytishicha, moliyachilar buni mablag‘larning past darajada o‘zlashtirilishi bilan izohlagan. Jumladan, 2023-yilda rejalashtirilgan 300,7 milliard so‘mning atigi 50 milliard so‘mi o‘zlashtirilishi rejalashtirilgan bo‘lib, shu bois kelgusi yil uchun prognoz 100 milliard so‘mga tushirilgan.
“Menimcha, bu yerda nega pul o‘zlashtirish kamligini o‘rganish kerak. Taxminimcha, xususiy sektorda ishlaydigan ayollarning katta qismi mehnat shartnomasisiz ishlaydi. Keyin byurokratiya. Pulni olish uchun korxona buxgalteri topshirishi kerak bo‘lgan hujjatlar bor, erinib, shuni qilmasa kerak”, — deb yozdi u X (Twitter) dagi sahifasida.
Eslatib o‘tamiz, 2022-yil 1-sentyabrdan O‘zbekistonda xususiy sektorda ishlayotgan ayollarga ham davlat tomonidan homiladorlik va tug‘uruq nafaqalari to‘lanishi boshlangan. To‘lov minimal isteʼmol xarajatlarining 4 baravari miqdori (2,27 million so‘m)ni tashkil etadi. O‘shanda bu maqsadlar uchun, budjetdan 2022-yilda 200 milliard so‘m, 2023-yilda esa 1,7 trillion so‘m yo‘naltirilishi aytilgandi.
Izoh (0)