Iqtisodiy hamkorlik tashkilotining sammiti doirasida Shavkat Mirziyoyev Tojikiston prezidenti Emomali Rahmon bilan muzokara o‘tkazdi. Bu haqda Prezident matbuot xizmati xabar berdi.
Qayd etilishicha, davlat rahbarlari ikki mamlakat o‘rtasidagi yaxshi qo‘shnichilik, strategik sheriklik va ittifoqchilik munosabatlarini yanada mustahkamlash masalalarini muhokama qilgan.
O‘zaro savdoni ko‘paytirish, mashinasozlik, energetika, elektrotexnika, to‘qimachilik va boshqa tarmoqlarda kooperatsiya loyihalarini ilgari surish bo‘yicha, shu jumladan, hukumatlararo komissiya faoliyati doirasida muvofiqlashgan ishlarni davom ettirish muhimligi qayd etilgan.
“Hududlar o‘rtasidagi ishbilarmonlik aloqalari va madaniy-gumanitar almashinuvlarni kengaytirishga alohida eʼtibor qaratildi. O‘zbekiston va Tojikiston yetakchilari bo‘lajak tadbirlar rejasini ham ko‘rib chiqdilar”, — deyiladi xabarda.
Tojikiston prezidenti Emomali Rahmon ham Iqtisodiy hamkorlik tashkilotining navbatdagi sammitida ishtirok etish uchun bugun, 9-noyabr kuni O‘zbekistonga kelgandi. Shavkat Mirziyoyev raisligida o‘tadigan IHT sammitida ishtirok etish uchun bunga qadar Qozog‘iston bosh vaziri Alixan Smailov, Pokiston bosh vaziri Anvar ul-Haq Kakar, Qirg‘iziston prezidenti Sadir Japarov, Turkiya prezidenti Rajab Toyyib Erdog‘on, Ozarbayjon prezidenti Ilhom Aliyev, Eron prezidenti Ibrohim Raisiy poytaxtga yetib kelgani xabar qilingan edi.
Izoh (0)