Sentyabr oyida O‘zbekiston mobil internet tezligi bo‘yicha dunyoning 141 mamlakati ichida 100-o‘rinni egalladi.
Avgust bilan solishtirganda O‘zbekiston mobil internet tezligi reytingida bir pog‘ona ko‘tarilgan. Mamlakatda sentyabr oyida mobil internet orqali o‘rtacha yuklab olish tezligi 23,63 Mbit/s, yuklash tezligi esa 12,6 Mbit/s ni tashkil qilgan.
Markaziy Osiyo davlatlari orasida Qozog‘iston sentyabr oyida mobil internet tezligi bo‘yicha birinchi o‘rinni egalladi (umumiy reytingda 66-o‘rin). Qirg‘iziston ikkinchi (88-o‘rin), O‘zbekiston uchinchi (100-o‘rin), Tojikiston to‘rtinchi (136-o‘rin) bo‘ldi. Turkmaniston bo‘yicha ma’lumot yo‘q.
Dunyoning barcha mamlakatlari orasida eng tez mobil internet Birlashgan Arab Amirliklarida qayd etilgan. U yerda sentyabr oyida yuklab olish tezligi 211,58 Mbit/s, yuklash tezligi esa 22,02 Mbit/s. Qatar ikkinchi, Xitoy esa uchinchi o‘rinda.
O‘zbekistonda internet tezligi
2022-yil dekabrda raqamli texnologiyalar vaziri Sherzod Shermatov O‘zbekiston aholisining internet xizmatidan foydalanuvchilari soni 31 milliondan ortganini ma’lum qilgandi. Vazirning qayd etishicha, xalqaro va shaharlararo telekommunikatsiya tarmog‘ini rivojlantirish maqsadida xalqaro internet tarmog‘iga ulanishning umumiy o‘tkazuvchanlik qobiliyati 2,6 barobar oshirilib, 3 200 Gbit/sekundga yetkazilgan.
Respublika 2022-yilda dunyodagi simli internet tezligi bo‘yicha reytingda 155-o‘rinda bo‘lgan. 2023-yilda esa natijalar o‘zgarib, 131-o‘ringa ko‘tarilgan. Yaʼni o‘tgan yilgi reytingga nisbatan 24 pog‘onaga o‘sish bo‘lgan. O‘zbekistondagi simli internet tezligi 21,67 Mbit/s ekani qayd etilgan.
Shuningdek, O‘zbekistonda 2023-yil mart oyidan boshlab mobil internet tezligi oshirilishi va mamlakat bo‘ylab 5G texnologiyasi joriy etilishi to‘g‘risida xabar berilgan edi.
Izoh (0)