Иқтисодий ҳамкорлик ташкилотининг саммити доирасида Шавкат Мирзиёев Тожикистон президенти Эмомали Раҳмон билан музокара ўтказди. Бу ҳақда Президент матбуот хизмати хабар берди.
Қайд этилишича, давлат раҳбарлари икки мамлакат ўртасидаги яхши қўшничилик, стратегик шериклик ва иттифоқчилик муносабатларини янада мустаҳкамлаш масалаларини муҳокама қилган.
Ўзаро савдони кўпайтириш, машинасозлик, энергетика, электротехника, тўқимачилик ва бошқа тармоқларда кооперация лойиҳаларини илгари суриш бўйича, шу жумладан, ҳукуматлараро комиссия фаолияти доирасида мувофиқлашган ишларни давом эттириш муҳимлиги қайд этилган.
“Ҳудудлар ўртасидаги ишбилармонлик алоқалари ва маданий-гуманитар алмашинувларни кенгайтиришга алоҳида эътибор қаратилди. Ўзбекистон ва Тожикистон етакчилари бўлажак тадбирлар режасини ҳам кўриб чиқдилар”, — дейилади хабарда.
Тожикистон президенти Эмомали Раҳмон ҳам Иқтисодий ҳамкорлик ташкилотининг навбатдаги саммитида иштирок этиш учун бугун, 9 ноябрь куни Ўзбекистонга келганди. Шавкат Мирзиёев раислигида ўтадиган ИҲТ саммитида иштирок этиш учун бунга қадар Қозоғистон бош вазири Алихан Смаилов, Покистон бош вазири Анвар ул-Ҳақ Какар, Қирғизистон президенти Садир Жапаров, Туркия президенти Ражаб Тоййиб Эрдоғон, Озарбайжон президенти Илҳом Алиев, Эрон президенти Иброҳим Раисий пойтахтга етиб келгани хабар қилинган эди.
Изоҳ (0)