Toshkent shahrida oktyabr oyida avtobuslardan 25 million 39 ming nafardan ziyod yo‘lovchilar foydalandi. Bu haqda “Toshshahartransxizmat” matbuot xizmati xabar berdi.
O‘tgan oy bilan solishtirganda, tashilgan yo‘lovchilar soni 2 million 50 ming nafarga ortgan. Bundan tashqari, oktyabrda yo‘nalishga chiqarilgan avtobuslar soni 46 898 ta (sentyabrga qaraganda 9599 taga ko‘p)ni tashkil etgan.
O‘tgan yilning ayni ikki oyida hozirgidan ancha kam yo‘lovchi avtobusdan foydalangandi. Xususan, sentyabrda — 11,6 million nafarga yaqin yo‘lovchi, oktyabrda — 13,650 million kishi avtobuslarda tashilgan.
O‘zbekistonda jamoat transporti
Prezident Shavkat Mirziyoyev o‘zining Oliy Majlis va O‘zbekiston xalqiga yo‘llagan murojaatnomasida jamoat transporti mutlaqo o‘zgarishi haqida aytgan edi. Shundan so‘ng aprel oyida Toshkentga Xitoydan 268 ta avtobus va elektrobuslar olib kelindi.
May oyida Buxoroga yangi 100 ta avtobus va mikroavtobus, iyul boshida Sirdaryo viloyatiga esa 160 ta yangi avtobus olib kelinishi ma’lum bo‘ldi. Avvalroq “Toshshahartransxizmat”ga yo‘lovchilarni tashishda ko‘riladigan zararlarni qoplash uchun 18 milliard so‘m ajratilgani, Toshkentdagi 32 ta avtobus yo‘nalishida “kunlik plan” bekor qilingani haqida xabar berilgan edi.
Izoh (0)