Navoiy viloyati prokurori Baxtiyor Ahmedov boshqa ishga o‘tgani munosabati bilan lavozimdan olindi. Bosh prokuratura matbuot kotibi Hayot Shamsutdinov ushbu ma’lumotni “Daryo”ga tasdiqladi.
Ma’lumotlarga ko‘ra, Baxtiyor Ahmedov Bosh prokuratura boshqarma boshlig‘i o‘rinbosari lavozimiga tayinlangan.
Baxtiyor Ahmedov 2020-yil 26-noyabr kunidan Navoiy viloyati prokurori lavozimida ishlab kelayotgan edi.
Ma’lumot uchun, Baxtiyor Ahmedov 1976-yilda Sirdaryo viloyatida tug‘ilgan. 1998-yilda Toshkent davlat yuridik institutini huquqshunos mutaxassisligi bo‘yicha tamomlagan.
1998—2001-yillarda Yangiyer shahar prokuraturasi ish o‘rganuvchisi, yordamchisi, katta tergovchisi, 2001—2002-yillarda Sirdaryo viloyati prokuraturasi ichki ishlar idoralarida Tergov va surishtiruv ustidan nazorat qilish bo‘limi prokurori vazifasini bajaruvchi, bo‘lim prokurori, 2002—2006-yillarda Sirdaryo viloyati prokurorining voyaga yetmaganlar haqidagi qonunlar ijrosi ustidan nazorat bo‘yicha katta yordamchisi sifatida ishlagan.
2006—2008-yillarda Prokuratura organlarida tergovni nazorat qilish boshqarmasi tarkibidagi axborot tahlil bo‘limi prokurori bo‘lib faoliyat ko‘rsatgan. 2008—2017-yillarda Sirdaryo viloyati prokuraturasida turli lavozimlarda ishlagan. Ahmedov 2017—2018-yillarda Bosh prokuratura huzuridagi Majburiy ijro byurosi Sirdaryo viloyati boshqarmasi boshlig‘i, 2018—2019-yillarda Navoiy viloyati prokurorining o‘rinbosari, 2019-yildan 2020-yilga qadar Sirdaryo viloyati prokurorining o‘rinbosari sifatida faoliyat yuritgan.
Izoh (0)