Buxoroga yangi 100 ta avtobus va mikroavtobus olib kelinadi

Buxoro viloyatiga 100 ta avtobus va mikroavtobus olib kelinadi. Bu haqda Transport vazirligi axborot xizmati xabar berdi.

Ta’kidlanishicha, ayni paytda viloyatda 265 ta yo‘lovchi tashish yo‘nalishlarida 2188 ta transport vositalari yo‘lovchilarga xizmat ko‘rsatib kelmoqda. 

Hozirda viloyat aholisining jamoat transportidan foydalanish darajasi 19 foizni tashkil etib, aholiga ko‘rsatilayotgan transport xizmatlari sifatini oshirish, yo‘lovchilarga qo‘shimcha qulayliklar yaratish, shahar jamoat transporti tizimini takomillashtirish bo‘yicha zarur choralar ko‘rilmoqda.

Joriy yilda viloyatga 100 ta avtobus va mikroavtobus olib kelinishi rejalashtirilgan. Ayni damda transport vositalarining dastlabki 30 donasini olib kelish bo‘yicha tegishli shartnomalar tuzilgan.

Xususan, Shofirkon tumanida faoliyat ko‘rsatuvchi “Oq yo‘l plus” MCHJ tomonidan Xitoyda ishlab chiqarilgan King Long mikroavtobuslaridan 6 tasi olib kelindi, yana 9 tasi olib kelinishi rejalashtirilgan. Yangi mikroavtobuslar Shofirkon—Buxoro yo‘nalishidagi qatnovlarga biriktirilgan.