AQSH sobiq prezidenti Donald Tramp Nyu-Yorkda fuqarolik firibgarligi bo‘yicha sud majlisida o‘z boyligi noto‘g‘ri hisoblanganini tan oldi.
Qayd etilishicha, 6-noyabr kuni qasamyod ostida bergan bayonotida u o‘zining kompaniyasi Floridadagi Mar-a-Lago rezidensiyasi va Doral golf maydoni, shuningdek, Nyu-Yorkdagi Tramp-tauer osmono‘par binosida joylashgan kvartiraning qiymatini oshirib ko‘rsatganini aytdi.
Reuters agentligining yozishicha, Tramp ushbu hisob-kitoblarning qiymatini pasaytirishga uringan. “Bu muhim emasdi. Ular buni muhimga aylandirdi, lekin muhim emas edi”, deydi u. Bundan tashqari, u qasamyod ostida ko‘chmas mulkiga oid hujjatlarni qalbakilashtirish ayblovlarini rad etgan.
Tramp so‘nggi 100 yildan ortiq vaqt davomida sudda ayblanuvchi sifatida guvohlik bergan birinchi AQSH sobiq prezidenti bo‘ldi. U bu jarayonda ikki marta yopiq eshiklar ortida ko‘rsatma bergan, biroq bu sud eshituvlari boshlanishidan oldin bo‘lgan.
Donald Trampga qarshi ayblovlar
Sud hujjatlariga ko‘ra, 2011- va 2021-yillar oralig‘ida Trump Organization oilaviy holdingi “kredit va sug‘urtaning qulay shartlarini ta’minlash yoki saqlab qolish uchun” o‘z aktivlari qiymatini milliardlab dollarga oshirib ko‘rsatgan. Bunday firibgarlik ayblanuvchilarga “noqonuniy jamg‘armalar va noqonuniy daromadlar evaziga yuzlab million dollarni” qo‘lga kiritishga imkon bergan, deyiladi hujjatda.
Bosh prokuror Letitsiya Jeyms Tramp uchun 250 million dollar jarima so‘ragan. Sobiq davlat rahbari ushbu fuqarolik da’vosi bo‘yicha qamoq jazosiga hukm etilmaydi. Trampning o‘zi unga qo‘yilgan barcha ayblovlarni siyosiy sababga ega va 2024-yilgi prezidentlik saylovlarida ishtirok etishiga to‘sqinlik qilishga qaratilgan deb atadi.
Oktyabr oxirlarida Donald Tramp sud amaldorlarini haqorat qilishni taqiqlovchi buyruqni buzgani uchun 10 ming dollar jarimaga tortilgandi.
Izoh (0)