АҚШ собиқ президенти Дональд Трамп судда ўз мулклари нотўғри баҳоланганини тан олди

АҚШ собиқ президенти Дональд Трамп Нью-Йоркда фуқаролик фирибгарлиги бўйича суд мажлисида ўз бойлиги нотўғри ҳисобланганини тан олди.

Қайд этилишича, 6 ноябрь куни қасамёд остида берган баёнотида у ўзининг компанияси Флоридадаги Мар-а-Лаго резиденсияси ва Дорал голф майдони, шунингдек, Нью-Йоркдаги Трамп-тауэр осмонўпар биносида жойлашган квартиранинг қийматини ошириб кўрсатганини айтди. 

Reuters агентлигининг ёзишича, Трамп ушбу ҳисоб-китобларнинг қийматини пасайтиришга уринган. “Бу муҳим эмасди. Улар буни муҳимга айландирди, лекин муҳим эмас эди”, дейди у. Бундан ташқари, у қасамёд остида кўчмас мулкига оид ҳужжатларни қалбакилаштириш айбловларини рад этган. 

Трамп сўнгги 100 йилдан ортиқ вақт давомида судда айбланувчи сифатида гувоҳлик берган биринчи АҚШ собиқ президенти бўлди. У бу жараёнда икки марта ёпиқ эшиклар ортида кўрсатма берган, бироқ бу суд эшитувлари бошланишидан олдин бўлган. 

Дональд Трампга қарши айбловлар 

Суд ҳужжатларига кўра, 2011- ва 2021 йиллар оралиғида Trump Organization оилавий ҳолдинги “кредит ва суғуртанинг қулай шартларини таъминлаш ёки сақлаб қолиш учун” ўз активлари қийматини миллиардлаб долларга ошириб кўрсатган. Бундай фирибгарлик айбланувчиларга “ноқонуний жамғармалар ва ноқонуний даромадлар эвазига юзлаб миллион долларни” қўлга киритишга имкон берган, дейилади ҳужжатда.

Бош прокурор Летиция Жеймс Трамп учун 250 миллион доллар жарима сўраган. Собиқ давлат раҳбари ушбу фуқаролик даъвоси бўйича қамоқ жазосига ҳукм этилмайди. Трампнинг ўзи унга қўйилган барча айбловларни сиёсий сабабга эга ва 2024 йилги президентлик сайловларида иштирок этишига тўсқинлик қилишга қаратилган деб атади. 

Октябрь охирларида Дональд Трамп суд амалдорларини ҳақорат қилишни тақиқловчи буйруқни бузгани учун 10 минг доллар жаримага тортилганди.