Toshkent viloyatida 2023-yilning nufuzli sport musobaqalarida yuqori natijalarga erishgan sportchilarni taqdirlash marosimi bo‘lib o‘tdi. Bu haqda “Daryo”ga viloyat hokimligi axborot xizmati xabar berdi.
Taqdirlash marosimida Osiyo, Paraosiyo o‘yinlari, jahon chempionatlarida sportning turli yo‘nalishlari bo‘yicha g‘oliblikni qo‘lga kiritgan va yaxshi natijalarga erishgan 24 nafar chempionga viloyat hokimi Zoir Mirzayev tomonidan tashakkurnoma hamda 15 milliondan 70 million so‘mgacha bo‘lgan pul mukofotlari topshirildi.
Sportchilarni taqdirlash marosimida viloyatdagi sektor rahbarlari, Yoshlar siyosati va sport vazirining birinchi o‘rinbosari Alisher Sa’dullayev, boshqarma va tashkilot, tuman va shahar hokimliklari mutasaddilari, nuroniylar vakillari, yoshlar yetakchilari, sportchilar va ularning murabbiylari hamda faxriylar qatnashdi.
Tadbir avvalida so‘z olgan Zoir Mirzayev O‘zbekistonni dunyoga tanitgan, davlat bayrog‘ini yuksaklarga ko‘targan viloyat chempionlarini, ularning ota-onalari va sport murabbiylarini samimiy tabrikladi.
Shuningdek, mamlakatimizda sportni rivojlantirish borasida amalga oshirilayotgan islohotlar hamda yoshlarga qaratilayotgan yuksak e’tibor o‘laroq, jahon maydonlarida erishilayotgan yutuqlar xususida ham ta’kidladi, — deydi hokimlik axborot xizmati rahbari Behzod Qobulov.
Qo‘shimcha qilinishicha, hozirda viloyatda O‘zbekiston davlat jismoniy tarbiya va sport universiteti, 26 ta sport maktabi, 4 ta ixtisoslashgan sport maktabi, Chirchiq olimpiya va paralimpiya sport turlariga tayyorlash markazi va futbol akademiyasi faoliyat yuritadi. Mazkur muassasalarda 1 325 nafar, shulardan 274 nafar ayol murabbiy trener 34 mingdan ziyod yoshlarni sport bilan muntazam shug‘ullantirib kelmoqda.
Bundan tashqari, “Besh tashabbus” olimpiadasi doirasida o‘tkazilayotgan sport musobaqalariga yoshlarning 56 foizi, yoki 597 ming nafari qamrab olindi va respublika bosqichida sovrinli o‘rinlarni egallab, 10 milliard so‘m evaziga 48 ta sport maydonchalari qurilishiga erishildi. Kelgusi yilda ham sport infratuzilmasini yaxshilashga 50 milliard so‘mdan ziyod mablag‘ evaziga bir qator obyektlar qurilishi rejalashtirilgan, — deydi mas’ul.
Izoh (0)