Тошкент вилоятида 2023 йилнинг нуфузли спорт мусобақаларида юқори натижаларга эришган спортчиларни тақдирлаш маросими бўлиб ўтди. Бу ҳақда “Дарё”га вилоят ҳокимлиги ахборот хизмати хабар берди.
Тақдирлаш маросимида Осиё, Параосиё ўйинлари, жаҳон чемпионатларида спортнинг турли йўналишлари бўйича ғолибликни қўлга киритган ва яхши натижаларга эришган 24 нафар чемпионга вилоят ҳокими Зоир Мирзаев томонидан ташаккурнома ҳамда 15 миллиондан 70 миллион сўмгача бўлган пул мукофотлари топширилди.
Спортчиларни тақдирлаш маросимида вилоятдаги сектор раҳбарлари, Ёшлар сиёсати ва спорт вазирининг биринчи ўринбосари Алишер Саъдуллаев, бошқарма ва ташкилот, туман ва шаҳар ҳокимликлари мутасаддилари, нуронийлар вакиллари, ёшлар етакчилари, спортчилар ва уларнинг мураббийлари ҳамда фахрийлар қатнашди.
Тадбир аввалида сўз олган Зоир Мирзаев Ўзбекистонни дунёга танитган, давлат байроғини юксакларга кўтарган вилоят чемпионларини, уларнинг ота-оналари ва спорт мураббийларини самимий табриклади.
Шунингдек, мамлакатимизда спортни ривожлантириш борасида амалга оширилаётган ислоҳотлар ҳамда ёшларга қаратилаётган юксак эътибор ўлароқ, жаҳон майдонларида эришилаётган ютуқлар хусусида ҳам таъкидлади, — дейди ҳокимлик ахборот хизмати раҳбари Беҳзод Қобулов.
Қўшимча қилинишича, ҳозирда вилоятда Ўзбекистон давлат жисмоний тарбия ва спорт университети, 26 та спорт мактаби, 4 та ихтисослашган спорт мактаби, Чирчиқ олимпия ва паралимпия спорт турларига тайёрлаш маркази ва футбол академияси фаолият юритади. Мазкур муассасаларда 1 325 нафар, шулардан 274 нафар аёл мураббий тренер 34 мингдан зиёд ёшларни спорт билан мунтазам шуғуллантириб келмоқда.
Бундан ташқари, “Беш ташаббус” олимпиадаси доирасида ўтказилаётган спорт мусобақаларига ёшларнинг 56 фоизи, ёки 597 минг нафари қамраб олинди ва республика босқичида совринли ўринларни эгаллаб, 10 миллиард сўм эвазига 48 та спорт майдончалари қурилишига эришилди. Келгуси йилда ҳам спорт инфратузилмасини яхшилашга 50 миллиард сўмдан зиёд маблағ эвазига бир қатор объектлар қурилиши режалаштирилган, — дейди масъул.
Изоҳ (0)