Fransiya hukumati Qozog‘istonga Ground Master 400 havo hujumidan mudofaa radar tizimini yetkazib beradi. Parij Markaziy Osiyo respublikasi “suverenitetini mustahkamlash” uchun shunday qadam tashladi, deb xabar bermoqda France24. Tegishli kelishuvlarga Fransiya prezidenti Emmanuel Makronning Ostonaga tashrifi chog‘ida erishilgan.
Ground Master 400 radari turli havo nishonlarini, jumladan, kichik dronlarni aniqlashga qodir zenit radar. Tizim bitta konteynerga joylashtiriladi, og‘irligi o‘n tonnadan kam.
France24, shuningdek, Fransiyaning EDF energetika korporatsiyasi Qozog‘istondagi birinchi atom elektr stansiyasini qurish bo‘yicha pudratchilar tenderida ishtirok etishini ta’kidladi. Bu borada yevropaliklar bilan uchta kompaniya raqobatlashadi: Xitoyning CNNC, Koreyaning KHNP va Rossiyaning “Rosatom” kompaniyalari. Qozog‘istonda AES qurish masalasi haligacha hal etilmagan, u umumxalq referendumida aniqlanadi.
Fransiya Qozog‘istonning asosiy hamkorlaridan bo‘lib, Parij Ostonaga kiritilayotgan investitsiyalar hajmi bo‘yicha Markaziy Osiyodagi geografik qo‘shni Xitoydan ham oldinda. Bunda TotalEnergies energetika giganti muhim rol o‘ynaydi.
Rasmiy ma’lumotlarga ko‘ra, aynan Qozog‘iston Fransiyaning uranga bo‘lgan ehtiyojining qariyb 40 foizini ta’minlaydi.
Makron va Qosim-Jo‘mart To‘qayev aviatsiya sanoati, farmatsevtika va ta’lim sohalariga taalluqli bir qator kelishuvlarni imzoladi. Eng muhim hujjatlardan biri strategik foydali qazilmalar bo‘yicha hamkorlik to‘g‘risidagi deklaratsiya bo‘ldi. Gap shundaki, Nigerdagi harbiy to‘ntarishdan so‘ng Afrika davlati Parijga uran yetkazib berishni to‘xtatgan. Shuning uchun Fransiya xomashyoni import qilish uchun yangi imkoniyatlar qidirmoqda. Uran qazib olish bo‘yicha dunyoda yetakchilardan bo‘lgan Qozog‘iston va O‘zbekiston Yevropa davlatida alohida qiziqish uyg‘otmoqda.
Izoh (0)