O‘zbekistonda faqat diniy rasm-rusumlarga binoan tuzilgan nikoh uchun jinoiy javobgarlik belgilandi

O‘zbekiston prezidenti imzolagan qonun bilan Maʼmuriy javobgarlik to‘g‘risidagi kodeksga kiritilgan o‘zgartirish va qo‘shimchalar haqida xabar berilgan edi. Adliya vazirligi ushbu qonun bilan Jinoyat kodeksiga kiritilgan o‘zgartirishlarni e’lon qildi.

Unga ko‘ra, nikohi qonunda belgilangan tartibda qayd etilmagan shaxslar o‘rtasida, shu jumladan nikoh yoshiga yetmagan shaxs bilan nikoh tuzishga doir diniy marosimni amalga oshirish, shunday qilmish uchun ma’muriy jazo qo‘llanilganidan keyin sodir etilgan bo‘lsa BHMning 75 baravaridan 150 baravarigacha (24 million 750 ming so‘mdan 49 million 500 ming so‘mgacha) miqdorda jarima yoki 360 soatdan 400 soatgacha majburiy jamoat ishlari yoxud 2 yildan 3 yilgacha axloq tuzatish ishlari bilan jazolanadi.

Milliy, irqiy, etnik yoki diniy adovatni targ‘ib qiluvchi materiallarni tarqatish maqsadida tayyorlash, saqlash yoki tarqatish, shunday qilmishlar uchun ma’muriy jazo qo‘llanilganidan keyin sodir etilgan bo‘lsa:

BHMning 300 baravaridan 600 baravarigacha (99 million so‘mdan 198 million so‘mgacha) miqdorda jarima yoki 2 yildan 3 yilgacha axloq tuzatish ishlari yoki 1 yildan 3 yilgacha ozodlikni cheklash yoxud 1 yildan 3 yilgacha ozodlikdan mahrum qilish bilan jazolanadi.

Milliy, irqiy, etnik yoki diniy mansubligiga qarab, aholi guruhlariga nisbatan adovat, murosasizlik yoki nifoq keltirib chiqarish maqsadida milliy sha’n-sharaf va qadr-qimmatni kamsitishga, diniy e’tiqodiga yoki daxriyligiga qarab, fuqarolarning his-tuyg‘ularini haqoratlashga qaratilgan qasddan qilingan harakatlar, shuningdek milliy, irqiy, etnik yoki diniy mansubligiga qarab, fuqarolarning ustunligini yoki nuqsonli ekanligini targ‘ib qilish, xuddi shuningdek milliy, irqiy, etnik mansubligiga yoki dinga munosabatiga qarab, fuqarolarning huquqlarini bevosita yoki bilvosita cheklash yoxud ularga bevosita yoki bilvosita afzalliklar berish 3 yildan 5 yilgacha ozodlikni cheklash yoxud 3 yildan 5 yilgacha ozodlikdan mahrum qilish bilan jazolanadi.

Oliy Majlis Qonunchilik palatasi majlisida O‘zbekistonda faqatgina diniy rasm-rusumlarga binoan tuzilgan nikohlar soni va buning ortidan ko‘p xotinlik holatlari, qonuniy nikohsiz tug‘ilgan bolalar soni oshib borayotgani qayd etilgandi.

Xususan, deputati Alisher Qodirov ushbu qonun haqida fikr bildirib, nikoh taqiqlanmayotgani u uni mustahkamlash uchun tartibga solinayotganini aytgandi. Deputat nikoh birinchi navbatda majburiyat ekanini, nikoh o‘qitib olib, uchta-to‘rttalab farzandni ko‘chaga tashlab ketayotgan erkaklar ko‘payib ketganini ta’kidlagandi.

“Davlatga ko‘rinmaydigan, qonunga asosan yordam berish mumkin bo‘lmagan behujjat ayollar, bolalar keskin ortib ketdi, bu ketishda nima bo‘ladi?! Nikoh, oila, farzand shunchalar beqadr bo‘ldimi? Nikoh taqiqlanmadi, uni mustahkamlash uchun tartibga solinyapti: avval ro‘yxatdan o‘t, davlat har bir fuqaroni hisobini bilishi kerak!” — degan edi deputat.