Ўзбекистонда фақат диний расм-русумларга биноан тузилган никоҳ учун жиноий жавобгарлик белгиланди

Ўзбекистон президенти имзолаган қонун билан Маъмурий жавобгарлик тўғрисидаги кодексга киритилган ўзгартириш ва қўшимчалар ҳақида хабар берилган эди. Адлия вазирлиги ушбу қонун билан Жиноят кодексига киритилган ўзгартиришларни эълон қилди.

Унга кўра, никоҳи қонунда белгиланган тартибда қайд этилмаган шахслар ўртасида, шу жумладан никоҳ ёшига етмаган шахс билан никоҳ тузишга доир диний маросимни амалга ошириш, шундай қилмиш учун маъмурий жазо қўлланилганидан кейин содир этилган бўлса БҲМнинг 75 бараваридан 150 бараваригача (24 миллион 750 минг сўмдан 49 миллион 500 минг сўмгача) миқдорда жарима ёки 360 соатдан 400 соатгача мажбурий жамоат ишлари ёхуд 2 йилдан 3 йилгача ахлоқ тузатиш ишлари билан жазоланади.

Миллий, ирқий, этник ёки диний адоватни тарғиб қилувчи материалларни тарқатиш мақсадида тайёрлаш, сақлаш ёки тарқатиш, шундай қилмишлар учун маъмурий жазо қўлланилганидан кейин содир этилган бўлса:

БҲМнинг 300 бараваридан 600 бараваригача (99 миллион сўмдан 198 миллион сўмгача) миқдорда жарима ёки 2 йилдан 3 йилгача ахлоқ тузатиш ишлари ёки 1 йилдан 3 йилгача озодликни чеклаш ёхуд 1 йилдан 3 йилгача озодликдан маҳрум қилиш билан жазоланади.

Миллий, ирқий, этник ёки диний мансублигига қараб, аҳоли гуруҳларига нисбатан адоват, муросасизлик ёки нифоқ келтириб чиқариш мақсадида миллий шаън-шараф ва қадр-қимматни камситишга, диний эътиқодига ёки дахрийлигига қараб, фуқароларнинг ҳис-туйғуларини ҳақоратлашга қаратилган қасддан қилинган ҳаракатлар, шунингдек миллий, ирқий, этник ёки диний мансублигига қараб, фуқароларнинг устунлигини ёки нуқсонли эканлигини тарғиб қилиш, худди шунингдек миллий, ирқий, этник мансублигига ёки динга муносабатига қараб, фуқароларнинг ҳуқуқларини бевосита ёки билвосита чеклаш ёхуд уларга бевосита ёки билвосита афзалликлар бериш 3 йилдан 5 йилгача озодликни чеклаш ёхуд 3 йилдан 5 йилгача озодликдан маҳрум қилиш билан жазоланади.

Олий Мажлис Қонунчилик палатаси мажлисида Ўзбекистонда фақатгина диний расм-русумларга биноан тузилган никоҳлар сони ва бунинг ортидан кўп хотинлик ҳолатлари, қонуний никоҳсиз туғилган болалар сони ошиб бораётгани қайд этилганди.

Хусусан, депутати Алишер Қодиров ушбу қонун ҳақида фикр билдириб, никоҳ тақиқланмаётгани у уни мустаҳкамлаш учун тартибга солинаётганини айтганди. Депутат никоҳ биринчи навбатда мажбурият эканини, никоҳ ўқитиб олиб, учта-тўртталаб фарзандни кўчага ташлаб кетаётган эркаклар кўпайиб кетганини таъкидлаганди.

“Давлатга кўринмайдиган, қонунга асосан ёрдам бериш мумкин бўлмаган беҳужжат аёллар, болалар кескин ортиб кетди, бу кетишда нима бўлади?! Никоҳ, оила, фарзанд шунчалар беқадр бўлдими? Никоҳ тақиқланмади, уни мустаҳкамлаш учун тартибга солиняпти: аввал рўйхатдан ўт, давлат ҳар бир фуқарони ҳисобини билиши керак!” — деган эди депутат.