Istanbuldagi Ayo Sofiya masjidiga kirish 2024-yil 15-yanvardan boshlab pulli bo‘ladi. Bu haqda Turkiya madaniyat va turizm vaziri Mehmet Nuri Ersoyga tayanib, Daily Sabah xabar berdi.
Shu bilan birga, ibodat qilish uchun kelgan Turkiya fuqarolari uchun masjidga kirish bepulligicha qoladi. Sayyohlar uchun Ayo Sofiyani ziyorat qilish qanchaga tushishi hozircha ma’lum emas.
“Biz Ayo Sofiya masjidida tashrif buyuruvchilarni boshqarish tizimidan foydalanishga o‘tmoqdamiz. Ziyorat sifati va xavfsizligi ortadi”, — deya ta’kidladi vazir.
1934-yilda Turkiyaning birinchi prezidenti Mustafo Kamol Otaturkning qarori bilan Ayo Sofiya sobori muzey maqomini oldi.
2020-yilda Turkiya prezidenti Rajab Toyyib Erdo‘g‘on ushbu joydan masjid sifatida foydalanishga qaror qildi.
Shundan so‘ng, Ayo Sofiyaga kirish barcha tashrif buyuruvchilar, shu jumladan, sayyohlar uchun bepul bo‘ldi. Masjid maqomini olishdan oldin, obyektga muzey abonementi yoki kassadan chipta sotib olish orqali kirish mumkin edi.
Eslatib o‘tamiz, bir necha yil avval Anqaraning Ayo Sofiyani o‘zgartirish to‘g‘risidagi qarori Gretsiyada norozilikka sabab bo‘lgandi. Vaziyat shu darajaga yetdiki, ikki davlat hukumatlari keskin bayonotlar almashdi. Erdo‘g‘on Ayo Sofiyada juma namozida qatnashgan paytda, Gretsiyadagi namoyishchilar Turkiya bayrog‘ini yoqib yuborgan.
Izoh (0)